Декабрь зурул 27-нний МахIачкъалалив, А. В. Вишневскийл цIанийсса азарханалул ( ГБУ РД «РКБ» им. А.В. Вишневского) залдануву, хьунни профессор АхIмад Хасаевлул 90 шинал юбилейран хас дурсса элмийсса конференция.

Ваний темагу дия кIира-шанна лахъи ларгсса азар дусса къашайшалт хъин буваврицIун дархIусса, «Актуальные вопросы ведения коморбидных пациентов» тIисса. Ва конференциялий гьуртту хьунни ДГМУ-рал ректорнал къуллугъ чIумуйну бартбигьлагьисса Висампаша Ханалиев, Дагъусттаннал терапевтътурал обществалул (ДНМОТ) председатель, профессор Сулайман Маммаев, кIицI лавгсса азарханалул хъунама хIакиннал хъиривчу Себебуллагь Аьбдуллаев, медуниверситетрал преподавательтал, профессорнал учениктал. Оьвкуну бия конференциялийн терапевтътурайн, кардиологтурайн, ревматологтурайн, пульмонологтурайн, гематологтурайн, сайки циняв медициналул минахуртурайн, ДГМУ-рал ординатортурайн ва аспирантътурайн.

Висампаша Ханалиевлул цала ихтилатраву кIицI лавгунни АхIмад Хасаевлул цIа республикалул кьатIувгу машгьурну душиву, ванал оьрму лавгшиву агьали хъин буллай ва ххуйсса хIакинтал хIадур буллай. Бувсунни АхIмад Хасаев къашайшалтраха аякьа хIура къадувайсса, цукун зун аьркинссарив лахьхьин буллали­сса эбратну ивкIшиву, жагьил­сса хIакинтурал кIулшивуртту куртIгу, цIакьгу дуллан гъира бутлатисса, гьарца чулуха кка­ккиялунсса хIакингу, тарбиячигу, каялувчигу ивкIшиву.
Себебуллагь Аьбдуллаевлул бувсунниХасаевлул ученик хьунсса хъунмасса тIайлабацIу хьушиву цанма, профессор мудангу чялишну гьуртту шай­сса ивкIшиву захIматсса къашайшала ххассал уллалисса иширттаву,ччарча реанимациялул отделениялий, ччарча консилиумрай.

– ХIакьину цIуллушиву дуруччаву, хъин буллалаву жулва бюхттулсса учительтурал хIасул бувсса школалул куннасса да­къар, цамур журалийсса дахханашивуртту хьуну дур, хIакьину гьанумур къулагъас дур компьютерданул диагностикалух, таний агьаммур бияла буссия хIакиннал пикри бувну бувсса хIукмулух, клиническое мышлениялух , АхIмад Хасаев диагноз дишаврил усттар ия, – увкуна Аьбдуллаевлул.

«Профессор Хасаев А.Ш.: аьлимчув, клиницист, наставник» тIисса доклад бувна Сулайман Маммаевлул. Ванал балжину бувсуна профессорнал оьрмулул ва даврил ххуллия, лахъазанная. КIицI лавгуна, шяравусса амбулаториялул хIакиннал даврий зий айивхьуну, Да­гъусттаннал Кардиологиялул ва къюкIлил сосудирттал хирургиялул центрданул профессорнал къуллугърайн ияннин, цала цува гьаз увсса инсан ушиву. 2015-ку шинал Аьра­сатнал кардиологтурал конгрессрай, ванал къюкIлил къашавайсса инсантал хъин баврихлу­сса захIматран лавайсса кьимат бивщуну, «Аьра­сатнал бусравсса кардиолог» тIисса цIа дуллушиву. Даву куртIну кIулсса хIакин, профессор ушаврицIун, ва дакI цIуцIаву дусса, къашайшалтрах цIимилий ургайсса, бюхттулсса мяърипатрал заллу ивкIшивугу.

– АхIмад Хасаевлул цуя-ца къашайшала къулагъас къадурну къаивтссар, чIун дуну-дакъа, цуксса цува мажал бакъа унугу, кIу къабивзун, цащава шаймур бувссар. ЗахIматсса къашайшалтрачIа мудангу лахъи лагайссия. Ванал ссавур душиврия, дакI-аьмал хъинсса ушиврия, къашайшалтран кумаг буван къаних уккаврия архIал зузиминнангу, агьалинангу кIулссия. Ва буниялттунгу агьалинал цIуллушиврул къаралданийсса хIакингу, каялувчигу ия хьухьугу-кьинигу. Даврил уртакьтурал, преподавательтурал, студентътурал ва жяматрал дянив ванал сий дуссия, хIурмат лахъссия, – увкунни Сулайман Маммаевлул.
Гихунмаймур конференциялул бутIа пленарный заседанияртту хIисаврайсса бия, медициналул агьамсса масъалартту гьаз буллалисса докладру бувна. Докладру бувминнавух бия Сулайман Маммаев, кафедралул доцент Сажид Загълиев ва цаймигу цIанихсса хIакинтал-аьлимтал.