Прессалул бал хьунни

МахIачкъалалив «Город» ресторандалуву хьунни аьдатравун багьсса прессалул бал. Ва буллалиссар гьарица шинах Дагъусттаннал Журналистътурал союзрал сипталийну ва сакиншиннарайну.

Гьашинусса бал 22-чинсса хъанай бия. Ва кIицI лаглан бивкIун бур 2001-ку шиная шихунмай.
Мероприятие тIитIлай, Журналистътурал союзрал председатель Аьли Камаловлул барча бунни цинявппагу чичлачисса, сурат ласласисса, эфирданийн ва дунияллул сетьрайн буклакисса журналистътал байрандалущал.

Ванал бувсунни Дагъусттаннал журналистикалул тарихрая, кIицI лавгунни хьхьичIунсса изданияртту ва журналистътал, мукунма дакIнин бивчунни, цала пишалул бурж дакI марцIну бартбигьлай, тIайламур бацIан буллай бивкIсса, чил канища ливтIусса жула журналистъталгу.

Мероприятиялул лагрулий лахъа-хъун бунни журналистътурал дянив сий хъуннасса «Мусил барзу» тIисса премия ларсми. 2022-ку шинал му премия ларсунни ца изданиялул ва 4 журналистнал. Миннавух бур хасъсса аьра­лий операция нанисса кIан­ттурдай хъанахъимуния бусан кIийла Украиннавун лавгсса «Дагестан» РГВК-лул корреспондент Умай Ибрагьимова.
ЛичIи-личIисса наградартту дуллунни, чIярусса шиннардий журналистикалул ххуллий зий, ххуйсса ккаккияртту чIалачIи дурсса журналистътуран.

«Легенда дагестанской журналистики» тIисса дипломру буллунни Дагъусттаннал журналистикалул тарихраву цIа кьариртсса, чIявуми аьпалул хьусса журналистътуран.
ЧIярусса шиннардий миллатрал пресса хьхьичIунмай баврил цIаний бивхьусса захIматрахлу ттунгу дуллунни Дагъусттаннал Журналистътурал союзрал чулухасса грамота.
Барча тIий буру цинявппагу журналистътурахь лайкьсса наградартту.

Жула пишалул сий хъиннура гьаз хьуннав. Жула «Илчигу» мудан хьхьичIунминнавух хъанайнма личIаннав!