Бартлавгунни оьрчIал хияллу

Декабрь зурул 26-нний Щалагу Аьрасатнал даражалийсса «Елка желаний» тIисса акциялувух гьуртту хьунни ДР-лул ХIукуматрал члентал ва властьрал органнал каялувчитал.

Дагъусттаннал ХIукуматрал идаралул фойераву бивхьусса елкалийн лавхъун бия оьрчIал хияллу бартлаган баву мурадрайсса бахшишру дусса шарду. Ва кьинисса байрандалий гьуртту хьун оьвкуну бия цIуллушиврул ссуссукьушиву дусса, ахIвал кIюласса кулпатирттавасса ва хасъсса аьралий операциялуву гьуртту хъанахъисса аьралитурал кулпатирттавасса оьрчIайн.
Гьашинусса шиналгу жула республикалий акциялул лагрулий ххари бунни цикссагу оьрчIру.

8 шинавусса ХIажиев Исмяиллул ноутбук машан ласун ччай бивкIсса хиял бартлаган бантIиссар Республикалул Виноградарствалул комитетрал каялувчи Шериф Каримхановлул, 12 шинавусса Латифан велосипед пиш-каш дантIиссар ДР-лул Информациялул ва печатьрал агентствалул каялувчи Жамалуттин Аьвдуразакьовлул, ДР-лул ХIукуматрал ЦIуссалакрал райондалия лак бизан баврил ва Аухуллал район цIу дуккан даврил масъаларттал управлениялул хъунама ХIажи Султановлул квадрокоптер бахшиш дантIиссар ХIамзатов Расуллун.
Шиккува кIицI лаган, 2022-ку шинал декабрь зурул 22-нний Дагъусттаннал БакIчи Сергей Меликов гьуртту хьунни Кремлилувусса «Елка желаний» тIисса акциялувух. Ларгсса шинал ДР-лул ХIукуматрал члентурал «Елка желаний» акциялул лагрулий бартлаган бувссар 50-нния ливчусса оьрчIал хияллу.