Дагъусттаннал Экономикалул министерстволул зузалтращалсса хьунабакьаврий ДР-лул ХIукуматрал Председатель Аьбдулмуслим Аьбдулмуслимовлул кIул бунни министерстволул коллектив цIусса каялувчи ХIажи Султановлущал. Ва экономикалул министрну итансса хIукму бувшиву Дагъусттаннал БакIчи Сергей Меликовлул бувсуна агьамсса масъаларттал хIакъиравусса оператив совещаниялий. Премьер-министрнал кIицI лавгунни ХIажи Султановлул ва къуллугъ бачин бансса опытгу, даражагу бушиву. Ванангу тIайлабацIу чIа увкуну, барчаллагь увкунни къуллугъ чIумуйсса бачин бувну ивкIсса Адильхан АхIмадовлухь.
Хъирив хIасиллу дунни министерстволул 2022 шинал дурсса давурттал, кIицI лавгунни уттиния тихунмай Дагъусттаннал социал- экономикалул даража гьаз бан, жула хIукуматран баян бувсса санкциярдал щавщи чIаланну биян къабитан ци дуллантIиссарив. Премьернал мукунма бувсунни регион хьхьичIуннай дан республикалул инвестициялул программалул (РИП) цуксса бияла буссарив.
– Инвестициялул программалул бияла хъунмассар республикалул хьхьичIунмай хъит учинсса давуртту щурущи давриву. Цумур бухьурчагу объект ва программалувун бутаврил хIакъираву ХIукуматрайн буккайсса идара хъанахъиссар Экономикалул министерство. Махъсса шиннардий инвестициялул программа дузрайн къадурккун лирчIсса ишру хъанай бур. Ларгсса шинал жу шамилла дарду дахханашивуртту республикалул инвестициялул программалуву. Ванийну чIалай бур программа цIунил ххал дигьин багьлагьишиву, программалувун бутансса объектру гьарица чулуха ххал бан аьркиншиву, му щаллу даврил ялув кьянкьану бацIан аьркиншиву, – увкунни Аьбдулмуслим Аьбдулмуслимовлул.
Ванал мукунма кIицI лавгунни 2022 шинал республика гьуртту хьушиву АьФ-лул 21 госпрограммалувух. Хъуннасса агьамшиву дусса «Развитие Северо-Кавказского федерального округа» госпрограмма аьркинсса куццуй щаллу дан бювхъушиву.
Мукунна Дагъусттаннан хъуннасса агьамшиву дусса «Социально- экономическое развитие горных территорий РД» ва цаймигу программарду щаллу давриха зий буссар Экономикалул министерство.
2022 шинал цукунсса давуртту дан бювхъуссарив бувсунни Адильхан АхIмадовлул. Ванал бусласимунийн бувну, «Социально-экономическое развитие горных территорий РД» программалул мероприятиярттал лагрулий кьамул бувну бур кабакьу баврил хIакъиравусса 349 аьрза. Хъинчулий ккавккун бур 221 аьрза, аьмну 75 миллион арцунсса. Вай хъанахъиссар итадаркьусса арцул 100-гу процент.
Хьунабакьаврил хIасиллу дуллай, премьер-министрнал кIицI лавгунни республикалий социал-экономикалул чулуха хьхьичIунну нанисса шагьрурдан шартIру дузал дан аьркиншиву. Мукунссаннун ккаллину бур Каспийск ва Дагестанские Огни шагьрурду.
