Халкьуннал шаэртурал юбилейрдая

Дагъусттаннал БакIчи Сергей Меликовлул каялувшиврийну хьунни Дагъусттаннал халкьуннал шаэр Фазу Аьлиевал 90 шинал юбилей дувавриха зузисса сакиншинначитурал комитетрал заседание. Шиккува ххал бивгьунни Расул ХIамзатовлул шин лайкьсса даражалий тIайла дуккаврицIун бавхIусса масъаларттугу.

– Уттизаманнул бюхттулсса вай шаэртал цава-ца ппурттуву дунияллийн ляхъавугу хIисавравун ласунсса иш бур, – увкунни Меликовлул.
Культуралул министр Зарема Буттаевал бувсунни Фазу Аьлиевал юбилейрацIун дархIуну дан дакIнийсса циняв давуртту дуршиву, выставкартту, конкурсру, фестиваллу, поэзиялул мажлисру лахъсса даражалий хьушиву. Аьрасатнал 36 субъектрай, хIукуматрал ва диаспоралул чялишсса гьурттушинна дурну, юбилейрал мероприятияртту дурну дур, вайннувух – «Лезгинка» къавтIаврил ансамбльданул концертру, суратирттал выставкартту ва поэзиялул мажлисру. Екатеринбурграй Фазу Аьлиевал суратирттащалсса постерду диркIун дур, Дальний Востокрай драмалул театрданул солистътурал поэтессал назмурду дурккуну дур, мукунна ванил оьрмулул ххуллия­сса киносурат ккаккан дурну дур ва дагъусттаннал миллатирттал лаххиялул выставкартту хьуну дур. Москавливсса Дагъусттаннал Постпредстволул хIарачатрайну ванил суратру дусса баннерду лархъун дур. Гьаннайсса, щалвагу билаятрай хъуннасса даву дур цIанихсса поэтессал назмурду машгьур даву мурадрай.

Дагъусттаннал хъунаманал наградартту дуллунни Фазу Аьлиевал юбилей лайкьсса даражалий тIайла дуккан захIмат бивхьуцириннан,
Меликовлул бувсунни Расул ХIамзатовлул шин республикалул ва федерал лагрулий лайкьсса даражалий тIайла дуккан хIа­дур хъанай бушиврия. Балжину цуку-цукунсса мероприятияртту хьунтIиссарив бувсунни Зарема Буттаевал. Ванил бувсунни шинал лажиндарай гьарца арвахI кьини МахIачкъалаллал централ проспектрай Расул ХIамзатовлул ­оьрус мазрайсса ва республикалул миллатирттал мазурдийсса назмурду ккалаккисса аудиотрансляция дикIантIишиву, ва Миллатрал библиотекалул проект душиву. Февраль зурул 21-нний Оьруснал театрдануву дикIантIий дур хъуннасса мероприятие. Гьануми мероприятиярттуми дикIантIий дур МахIачкъалалив шаэр ув­сса кьини сентябрь зурул 8-нний ва Москавлив ПаччахIлугърал Кремлилуву сентябрь зурул 28-нний.