Жяматрал вакилтурал тIимуних вичIи дирхьунни

Ларгсса нюжмаркьини ДР-лул Миллатирттал политикалул ва диндалул иширттал министерствалийн цала жяматрал буруккинттащал бувкIун бия ЦIуликъяннал шяраваллил вакилтал: шяраву ва шагьрулий ялапар хъанахъисса кьуяксса инсан. Вай кьамул бунни министрнал хъиривчу Гьарун Давыдовлул.

ЦIуликъянн

ал жямат бувкIун бия шяраваллил ва райондалул администрациялул чулуха цала къювусса масъаларттах къулагъас дакъашиврийн бувну. Цала мурадирттая бувсунни инициатив группалул вакил, Системный технологиярттал институтрал ректор, профессор КьурбанмахIаммад КьурбанмахIамадовлул, хIа­кин МахIач Исмяиловлул, МахIаммад Кьурбановлул ва цайминнал.

ЦIуликъяннал шяравалу дур Ахъушиял райондалийсса мукьра лакрал шяравалливасса ца. Ванилгу ва чIаххуврайсса Щукъттиял шяраваллилгу бур ца администрация. Му бур Щукъттиял шяраву. Цанния ца ряхра километралул манзилданийсса вай шяраваллал дянив дур зунттул лахъазан. Зунттуйх шярава шяравун бучIан бигьану бакъар, хаснува кIинттул чIумал. Зунттул чуллу левкьун, инсантуран бала-апатI хьусса ишругу шай­сса бур.

БувчIлачIисса зат бур, администрация аьмсса бухьувкун, ЦIуликъяннал инсантуран, дяркъу-гъилишиву къаувкуну, гьарица чIири-хъунсса аьркиншиндарал ялув Щукъттив занан багьлай бушиву. Укунсса тагьарданул ЦIуликъяннал жяматран цин лархьхьусса захIматшивуртту хъанай дур. Махъсса ппурттуву тIурча хъиннура паракьат дакъасса тагьар хIасул хъанай дур, инсантурахьгу цIухху-бусу бакъа, аьрщив дачIлачIаву, цалалуш дуллалаву сававну. Мунилшиврий, ризкьи итабакьинсса лух­ччив диялну дакъа, шяраваллил инсантурал дянив къалмакъаллу хъанай дур. Вай масъалар­тту закондалул ххуллий щаллу буллай администрациягу бакъар. Вайгу, цаймигу цаннан ца къабувчIлачIисса кIанттурду хъанай тIий, ЦIуликъяннал жяматран ччай бур, цала жяматрал масъаларттаха зунсса шяраваллил администрациялул бакIчинал хъиривчугу ивтун, администрациялий цала вакил уну. Шяраваллил цаппара активистътал, низам ядаву мурадрай, ва даву укра дуллангума рязину бусса бур.

Ци масъалалущал буккарчагу райондалул хъуниминнайн, цал тIутIимуних вари чинсса ургъил бакъар тIий бур жяматрал вакилтал. Жяматрал, цалла арцу дартIун, бакьин бувну бур зия хьусса трансформатор, даххана дурну дур токрал ттарцIру ва ххаллу.
Министерствалийн бувкI­миннал бувсмунихгу вичIи дирхьуну, Гьарун Давыдовлул вайннал масъала Республикалул ХIукуматрал хьхьичIун ласунсса махъ буллунни.