Кьурбанисмяиллул арс Аьбдуллаев Амин
Вай гьантрай, оьрмулул 88 шинаву, дунияллия лавгунни ГьунчIукьатIрал шяравасса, лакрал миллатрал бусравсса арс, 2003-ку шиная шийнай «Илчилий» зий ивкIсса, Кьурбанисмяиллул арс Аьбдуллаев Амин.
Дагъусттаннал шяраваллил хозяйствалул институтгу бувккуну, агрономнал даврия айивхьуну, колхозрал председательнал къуллугърайн ияннин зий, захIмат буллай ивкIсса, шяраваллил инсантурал оьрмугу, аьрщарал хIалгу ххуйну кIулсса Аминнул цIу- бутIуй чичайссия шяраваллил хозяйствалул масъалартту гьаз буллалисса макьалартту.
Хъинну хъирив лавну, лахьлай, батIлай икIайва цала буттал шяраваллил тарих. Яла, чивчуну, буккангу бувна дунияллий багьа бищун къашайсса луттирду: ГьунчIукьатIрал фронтовиктураясса, тухумирттал тарихраясса, зунттал цалчинсса энергетиктураясса, шяраваллил цIанихсса цаймигу инсантураясса. Цайми-цаймигу дурссар Аминнул шяраваллил агьулданул бусрав-барчаллагьрай кьамул дурсса давуртту.
Тарихрайн дагьлагьисса дикIу, цайми къювусса масъалартту гьаз буллалисса дикIу, буккултран асар хьунсса ва хъамакъаритансса макьалартту чирчуссар Аминнул «Илчилий» зузиссаксса хIаллай. Подпискалул отдел бакIрайн ларсун, тамансса шиннардий подпискалулссагу буллай уссия. Цикссагу хьуссар замгьарданувух, бурандалувух Амин цува кказит буккултрачIан биян буван лавгсса ишругу. Ва ия дазу дакъа буттал улча, миллат, миллатрал культура, маз ххирасса инсан. Ва ия дунияллий хъанахъисса иширттал хIакъираву цала граждан позиция бусса ва кьянкьану му бугу-буруччайсса чув.
Амин Аьрасатнал Журналистътурал союзрал членгу ия, диялсса ХIурматрал грамотарттангу лайкь хьуссия. 2019-ку шинал Дагъусттаннал ХIукуматрал ванан дуллуссар «Буттал аьрщарахсса ччаврихлу» тIисса ХIурматрал лишан. НасихIатчи, коллега хIисаврай акъассагу, «Илчилул» коллективран ва бусравссия дакI-аьмал хъинсса, сахаватсса, оьнийгу, хъиннийгу ца уссу, ппу куна чIарав ацIайсса чумартлув хIисаврайгу.
ТIуллу алвагьсса, учаймур тIайланма учайсса, гьунарду чIявусса, кару магьирсса, хасият уздансса Амин Аьбдуллаев личIантIиссар жул дакIурдиву. Цув алжаннул агьулданувух уваннав, гьаттай нур дизаннав!
ДакIнийхтунусса кьурчIишиву кIидачIлай, жижара буллай буру ванал кулпатрахь Лизахь, арснахь Загьидинахь, душнихь Аминахь ва махъсса цинявппагу уссур-ссуннахь, щалвагу агьулданухь, ГьунчIукьатIрал жяматрахь.
Махъ-махъ редакциялийн увкIсса ппурттуву Аминнул, суратгу рирщуну, ва сурат ттул некролограйгу рищара куна. Жугу, жула Аминнул махъва-махъсса тавакъю щаллу буллай, ваналгу, цайми даврил уртакьтуралгу жуйнма аманат бувсса «Илчи» кказит лайкьну ябуван жущава шаймур буллансса махъ буллай буру.
«Илчилул» коллектив
ХIайп, лавгунни жуятува жуна акъа чара бакъасса, щала ГьунчIукьатIрал жяматран ххирасса, бусравсса хъуначу, маслихIатчи, захIматчи, шяраваллил тарих гьануцIава кIулсса, щалава цала оьрму шяраваллил хозяйствалуцIун бавхIусса Амин Аьбдуллаев.
Аминнул сипталийнуя сакин дурсса «ГьунчIукьатIи» ккурангу, Хъунисриннал советрал председателъя цувагу. Жул цинявнналагу учитель, гьартасса дакIнил заллу, ттулагу хъунама уссу кунасса инсанъя Амин.
Мискин хьуссар жула жямат Амин жуятува лавгун, жунма цинявннан ва акъашиву кIул хъанантIиссар.
Хъуннасса кьурчIишиву кIидачIлай, жижара буллай ура Аминнул кулпатрахь, арснахь, душнихь, мачча-гъаннахь, агьлу-авладрахь. Имандалий лавгун лякъиннав, цал бунагьирттал аьпа баннав.
ХI. ХIусайнов,
«ГьунчIукьатIи» ккурандалул председатель
Макьсудлул арс АьвдурахIманов Аьвдуллагь
Вай гьантрай, захIматсса цIуцIаврища ххассал къавхьуну, оьрмулул 65 шинаву жуятува личIи хьунни ххаллилсса зунтталчу, бусравсса учитель, Ккуллал шяравасса Макьсудлул арс АьвдурахIманов Аьвдуллагь.
Буттал лажин ккаккан нясив къавхьусса Аьвдуллагь, ванал уссу Аьлил, ссу Аьишат лайкьну чивун буккан бувну бур ниттил Марижатлул.
Ккуллал шяраву школагу къуртал бувну, Аьвдуллагь лавгун ур аьралуннаву къуллугъ буллан. ОьрчIнийва канил пагьму бусса Аьвдуллагь аьралий частьраву штабрал художникну ивтун ивкIун ур.
Муния махъ Аьвдуллагьлул бувккуну бур Москавуллал Халкьуннал искусствардал университет. Ва къуртал бувну мукьах зий ивкIун ур Каспийскаллал «Точный механикалул заводрай» художник-оформительну. Шикку зузисса хIаллай Аьвдуллагьлул, лайкь дурну дур диялсса хIурматрал грамотартту ва барчаллагьрал чагъарду.
Буттал кIану ххирасса, жяматрах ччаву дусса Аьвдуллагьлул цала кулпатращал архIал Лаккуйн зана хьуну, дурссар ххаллилсса къатри Ккуллал шяраву. КIийн увкIун махъгу зий ивкIссар райондалул КБО-рай ва искусствалул школалий художникну. Аьвдуллагь икIайва цала бюхъу-гьунарданийну гьашиву къадайсса, кIулшивурттах мюхтаж увксса инсан.Зийгу унува, къуртал бувссия Дагъусттаннал паччахIлугърал университет. Ва къуртал бувну махъ зий уссия цал Ккуллал 1-мур школалий, яла махъ 2-мур школалий.
Аьвдуллагьлул цала ххаллилсса кулпат Софиящал хъуни бувссар цанма лайкьсса кIия арс ва ца душ. ДакI-аьмал аьчухсса, цинявннан бусравсса Аьвдуллагьлул ужагърай тачIав хъамал чан къашайссия.
Аьвдуллагь дунияллия лагаврил кьурчIишиву кIидачIлай, жижара буллай буру ванал кулпатрахь Софияхь, арсурваврахь Макьсудлухь, Гьаруннухь, душнихь Марияннухь, уссихь Аьлиллухь, ссихь Аьишатлухь ва цинявппагу гъан-маччаминнахь.
Цал гьав нурданул дуцIиннав, алжаннул ххари аннав, махъминнал оьрмурдай барачат бишиннав.
Ккуллал жямат
АьвдурахIманов Аьвдуллагьлул
аьпалун
Агь, ттул аьзизсса уссай,
ИвкIсса ина ххирасса:
Ссавнийсса ххяххабаргъну
Ухьунссияв ина жун.
Ятинну хъун хьунугу,
ЦIимилухун къаагьну,
ХIарамшиву къадурну
ХIалалну ччатI бувкуссар.
Лаккуй къатригу дурссар,
Лакку кулпатгу бувссар.
Муситал хьу оьрчIругу
Ххаллилну хъуни бувссар.
Вил исвагьи кIиссурттал
Пилча канил бугьайхту,
Эмаратсса суратру
Холстрай хьуну лякъайва.
Уссай, вил суратирттал
Музейрду чIюлуну бур,
Жун ми чIалай дуссаксса,
ДакIния къаукканну.
Ссу Аьишат
