Ххуллункьини МахIачкъала шагьрулул Хъун майданнив хьунни республикалул лагрулийсса шяраваллил хозяйствалия дучIаймунил ярмарка. Цувгу хас дурну дия октябрь зуруйра кIицI ларгсса Шяраваллил хозяйствалул зузалал кьинилун.

Минсельхозпродрал шяраваллил хозяйствалул дукиялул базаллул ва экспортрал потенциалданул отделданул каялувчи ХIабибат ХIажиевал бусаврийн бувну, ярмукIалий гьурттушинна дурунни республикалул дукия итадакьайсса идарарттал, аграриялул университетирттал, элмийсса центрдал ва мукьцIаллий кIирагу райондалул. Шяраваллил хозяйствалул хъус дирхьуну дия гьарца идаралул цанма-цанма ккаккан бувсса майданнай.

Шяраваллил хозяйствалул хъус дакъасса майданнай дирхьуну дия республикалул кьатIувгу кIулсса Дагъусттаннал канил усттартурал давуртту.
Хъуншагьрулул агьулдануща ва хъамаллураща шикку бюхълай бия базаллул багьлуяр кьюркьуну машан ласун ссуттихуннай дучIайсса ахъулсса ва ахънил­сса, накIлия ва дикIуя дучIаймур, ницIал ва туртул журарду ва цаймигу шяраваллил хозяйствалия дучIаймур.

ЯрмукIалий тамаша бан бюхълай бия зунттал гьаннарал ­яттий, Ахалтекинский гьаннарал дучрай.
Му бакъассагу, гьарца майданний тIиртIуну дия цала-цала кIанттун хасъсса урцIив. ЯрмукIалийн бувкIсса хъамаллураща ва машачитураща бюхълай бия миннуя бисмиллагь бувну, тIин ххал бан. Районнал магьирлугърал зузалтгу бия машачитурал макьу гьаз дансса балайрду тIий, къавтIий.
Ккуллал ва Лакрал районнал урцIаву дирхьуну дия шархьсса кьаркь дикI, ккурккимай, кIарттул ччатI, нис, аьрайн-гьавккури, дукьрахIан.
Лакрал райондалул шяраваллил хозяйствалул управлениялул каялувчи Макьсуд Кьадиевлул бусаврийн бувну, кIюрххицIунна, майдан тIитIинсса мугьлатвагу бакъа, хъямала дурну дия Ибрагьимов Симардин заллусса ЧукIуннал КФХ-лул итадакьайсса хъус: дахьва бивхсса гъаттарал дикI (350 къ. килону), кьаркьдикI ва ккурккимай (1200 къ. килону). Ялун багьну ласлай бия вава КФХ-лий дуллалисса лагаву, Кьубиял СПК-лул ххяххан бувсса ппиринж.

Майданнайх уклай, шяраваллил хозяйствалул зузалтращал жап тIий ия ДР-лул ХIукуматрал хъунама Аьбдулмуслим Аьбдулмуслимов, цала хъиривчутуращал Нариман Аьбдулмуталибовлущал, Мурад Казиевлущал, аьрщарал ва хъуслил иширттал министр Заур Эминовлущал, шяраваллил хозяйствалул ва дукиялул министр Мухтарбий Аджековлущал.
Премьер-министрнал барчаллагь увкунни республикалул шяраваллил хозяйствалул зузалтрахь яла нанисса захIматсса шинаву жула агьалинан санкцияртту асар хьун къабитаврихлу.
«Жура лайкьну тIайла дуклай буру яла нанисса шин, гьарца аралуву ххуйчулийннайсса дахханашиннардащал. Ми дахханашиннарду ххи дуллансса хIарачат буллан аьркинссару жува ванияр тинмайгу», – увкунни премьер-министрнал.

ЯрмукIа къуртал хьуну махъ «Дружба» залдануву хьунни яла нанисса шинаву хьхьичIунсса ккаккияртту хьун дурсса шяраваллил хозяйствалул зузалтран наградартту дуллалисса шадлугъ.