Декабрьданул 2-нний МахIачкъалаливсса «Аьрасат – ттул тарих» тIисса тарихийсса паркраву 200-нниха ливчусса лакрал инсантурал чирчунни лакку мазрайсса диктант. Найбунува бусанна гьашинусса диктантран язи бувгьушиву гьунар бусса чичу Казбек Мазаевлул бивкIу бакъасса «Виратти» тIисса кьиссалувасса парча.
Мероприятиялул дайдихьу дуллай, мажлис нани бувсса Дагъусттаннал культуралул лайкь хьусса зузала Супиян Оьмаровлулгу, лак – лакку мазгу, миллатгу яшаврил ххуллийсса агьамсса даву дуллай бушиврий чIурчIав дуллай, кIицI лавгунни хIакьину жува цачIун хьуну бушиву цал уттигу жула чIу баян бан. Бувсуна миллатрал маз яшаврил цIаний дакI аьтIутIисса инсантурал сипталийну дуллалисса даву душиву диктантгу. Сиптачиталлив Аьрасатнал тарихрал обществалул Дагъусттаннаймур отделениялул хъунама, тарихрал элмурдал доктор, ДИРО-лул проректор АхIмад Кьурбановри, Мариян Илиясовал цIанийсса «Дараччи» фондрал хъунмур Гульшан Хасаевар ва МахIачкъала Шагьрулул депутатътурал мажлисрал хъунама Марис Илиясоври.
Диктантрайн бавтIцири барча буллалисса махъ лахълай, АхIмад Кьурбановлул бувсуна 2019-ку шинал, к1ира шинал хьхьич1, лакрал агьалинал тарихраву цалчинсса тотальный диктант чирчуну диркIшиву. Бувсуна аьпалухьхьун лавгсса, хъуни-хъунисса давурттугу, хъинбаларттугу миллатран бувсса, Амучи Амуттиновлул сипталийну ва диктант аьдатравун дагьну душиву. Жува ниттил маз лахъа-хъун буллай бухьурча, жулва мазрал хIурмат ва кьимат бухьурча, маз тачIав бухкъалагантIишиву.
Халкьуннал Мажлисрал Комитетрал каялувчи Артур Исрапиловлулгу кIицI лавгуна маз ябангу, гьаз бангу жулва биялалийсса иш бушиву, циняв ца хьуну маз ябуван чялиш буккан аьркинсса тагьар чIалай душиву. Хъусращиял шяраваллил халкьуннал театрданул режиссер Марсель Сулаймановлул кIицI лавгуна залдануву жагьилтал чанну бушиву, лакку маз буруччинсса чараннавух кIицI лавгуна лакрал чичултрал произведенияртту интернетраву бишин аьркинну бушиву, смартфоннай, мобильникирттай бухьурча лакку маз, оьрчIру ва жагьилтал миннувун кьувтIуну бухьувкун.
«Илчи» кказитрал хъунама редактор Руслан Башаевлулгу, ЦIуминалийсса Имамтурал советрал председатель Мансур Хаваевлулгу, цайминналгу зумувсса тема ца дия: буттахъая бутIурай бувксса ххазина – лакку маз ябуваншиврул, мюрщину бунува, нитти-буттал, учительтурал бюхъай-шай буллай, оьрчIаву цIакь дан аьркиншиву ниттил мазрахсса, буттахъал аьдатирттахсса ччаву, ниттил маз ххирашиву ва муний гъалгъа тIутIаву – мугу жула буттал кIану ххирашиврул лишан душиву, ниттил мазраву бушиву миллатрал код – хьхьичIрасса никирал чIугу, буттахъал тарихрал бутIагу ва хIакьинусса кьинилул бущи-тарггу.
ЧIярусса шиннардий Лакрал радиолий зий ивкIсса журналист, цIанихсса диктор, Дагъусттаннал культуралул лайкь хьусса зузала Гъаза Гъазаевлул 90 шинал юбилей барча дуван ванан бахшиш дуллуна Гульшан Хасаевал. Мариян Илиясовал цIанийсса премия дуллуна лакку мазрал шинал учитель хIисаврай Уриннал школалул учительница Асли МахIаммадован. Ванин бахшиш ва диплом буллуна цила Гульшаннул ва Марис Илиясовлул. Лакку мазрал диктант дуккингу ванийн тапшур бувна.
Диктант чирчуну мукьах дия культуралул программа, лакрал шаннагу райондалул культуралул управлениярттал вакилтал ва Лакрал театрданул артистътал хIаласса. КIицI къалавгун битан къахьунссар ХIабибат Буттаевал лакрал вирттавраха цилва ляхъан бувсса балайлул бюххансса асар биян бунни тIими чIявусса бивкIшивугу. Балайрду, гьар мудан кунма, дакIру хъюлчай тIутIи дуванну увкуна яргсса балайчитурал: Рашид Багатаевлул, Халисат Батирбековал, Арслан Шагьмардановлул, ХIабибуллагь Кьурбановлул, Аьзиза Ах1мадовал. Дия къавтIаврил ансамбллугу. Лакку мазрайсса назмурду дурккуна оьрчIал: Айна Аьлиевал, ПатIимат Сулаймановал, Зулпукьар Ильдаровлул ва цайминналгу.
Вара кьини лакку мазрайсса диктант чирчуссар Лакрал диаспоралул вакилтурал Москавливсса Дагъусттаннал Постпредствалийгу. Барчаллагьрай кIицI лаган аьркинни ва даву дуван ка кIидархIусса спонсортурал цIардугу: Аьрасатнал экологиялул ялув бацIаву дуллалисса Къапкъазуллал управлениялул хъунаманал хъиривчу, Ростехнадзорданул Дагъусттаннаймур отделениялул хъунама Артур Амуттинов, Гульшан Хасаева ва Марис Илиясов. Диктантрайн бавтIцириннан бисмиллагь буван дуки-хIачIиялул кьуцуртту лавсун бувкIун бия районнаясса делегациярттацIун Казбек Мазаевлул ичIувациригу.
Диктантраясса текстравун ххи бан:
Гьашинусса диктант хас дурну дия паччахIлугърал ва жяматийсса ишккакку, Дагъусттаннал автономия хIасул дурминнал бакIщаращуй ивкIсса чичу, публицист Саэд ХIабиевлул 140 шинал юбилейран, Дагъусттаннал халкьуннал шаэр АбутIалиб Гъапуровлун 140 шинал юбилейран ва аьлимчу, «Лакку маз ва тарих» тIисса энциклопедиялул журалийсса словарь сакин бувсса Аьли Къаяевлул (Замир Аьли) 145 шинал юбилейран, лакрал чичу, философ, прозаик ва драматург Мирза МахIанмадовлул 100 шинал ва журналист, чичу, историк Сулайман Мусаевлул 80 шинал юбилейрдан.
Москавливгу чирчусса лакку мазрайсса диктантрая бусанну хъиривмур номерданий.
