Москавлив Литератортурал централ къатраву (ЦДЛ) хьунни Дагъусттаннал Чичултрал союзрал хъунама, Дагъусттаннал поэзиялул театрданул каялувчи, Дагъусттаннал халкьуннал шаэр МахIаммад АхIмадовлул творчествалул мажлис.
Мажлисрал дайдихьу дуллалисса махъ лахълай, Аьрасатнал Чичултрал союзрал правлениялул председатель Николай Ивановлул МахIаммад АхIмадовлун пишкаш бунни союзрал лишаннащалсса бейсболка ва футболка.
Халкьуннал шаэр барча уллалисса ихтилатру бунни Аьрасатнал Чичултрал союзрал секретарь Геннадий Ивановлул, «Жагьилсса гвардия» журналданул редактор Валерий Хатюшиннул, «Москавуллал литератор» кказитрал хъунама редактор Иван Голубничил, филологиялул элмурдал доктор МахIаммад МахIаммадовлул, шаэртал Алексей Шороховлул, Владик Батмановлул ва цайминнал.
Москавливсса Дагъусттаннал Культуралул центрданул чулухасса барча уллалисса адрес дурккунни центрданул вице-президент БатIи Оьмаровал. Ва мажлисрай гьурттушинна дунни Москавуллал Миллатирттал къатлул вакил, Дагъусттаннал культуралул лайкь хьусса зузала ПатIимат ХIаммадовалгу, машгьурсса балайчи ПатIима Лакиялгу.
