Декабрь зурул 5-нний Аьрасатнаву кIицI лагайссар Волонтернал кьини. Волонтернал кьинилуцIун бавхIуну «Дагестан» РИА-лий хьунни Дагъусттаннал Жагьилтурал министерствалул зузала Илгар Лелаевлул пресс-конференция.

Студентътуращалсса ва зузисса жагьилтуращалсса давриха зузисса отделданул вакилнал хIасиллу дунни нанисса шинал волонтертурал дурсса давурттал.
– Волонтернал кьини жула республикалул жагьилтуран агьамшиву дусса байранни, цанчирча вайннал хъуннасса, багьа бищун къашайсса гьурттушинна дурссар волонтертурал суккушиннарал давриву пандемиялул чIумал. ЦIанакулгу вай чялишну зий буссар хасъсса операциялуву гьуртту хъанахъиминнан, мобилизациялул хьуминнал кулпатирттан кумаг буллай.
Илгар Лелаевлул бувчIин бунни волонтертурал кьюкьравун буххан ччиминнаща, Добр.рy. сайтрайн бувххун, микку регистрация дан хьунтIишиву.
КIицI лаган, ва сайтрай хIакьинусса кьини 60 азарунниха ливчусса дагъусттанлувтал бур. Дагъусттан волонтертурал суккушиннарал чулуха Аьрасатнал регионнаву хьхьичI ххуттай бур.
Спикернал бувсунни национал проектру щаллу даврил хIакъиравугу.

Ва чулухагу волонтертуран кумаг бур республикалул ва федерал агентстварттая.
– Ларгсса шинал волонтертурал сиптарду дузрайн дуккан дан 8 миллиондалийн бивсса субсидияртту ласарду. Волонтертурал суккушинна хъиннура чялиш дуккан дансса, ялун нанисса ник Ватан ххирану тарбия дансса давурттан 3 миллион грантру ласарду.

Ва бакъассагу, жагьилтурал иширттаха зузисса Федерал Агентствалул гьарица шинах дулайссар 7 миллиардрансса грантру жагьилтурал сиптарду дузрайн дуккан дан. Миннал кумаг байссар социал проектирдан, – бувсунни Илгар Лелаевлул. Ванал бусласимунийн бувну, 14 шинава 35 шинавун бияннинсса гьарица инсаннаща бюхъайссар, системалуву регистрация дурну, грантрал конкурсирдая кIул бан ва миннувух гьуртту хьун.