Ярагъуннил хIакъиравусса законну

«Дагестан» РИА-лий хьунни Дагъусттаннал Росгвардиялул управлениялул хъунаманал хъиривчу – ЦЛРР-нул (Центр лицензионно-разрешительной работы) хъунама полициялул полковник Навруз ХIусайновлул пресс-конференция.

ХIаписарнал дунни шинал лажиндарай цала подразделениялул дурсса даврил хIасиллу. Ванал бувсунни нанисса шинал ярагъ ябаврил тагьар кIул даву мурадрай 90 азарунния лирчусса ххалбигьавуртту дуршиву. Вай ххалбигьавурттал ялун личин бувшиву ярагъунницIун дархIусса законну къадурурччусса 9 азаруннийн бивсса ишру. Ххалбигьавурттайн бувну зевххуну бур азарунния ливчусса тIайла бакъа буллусса документру. ПаччахIлугърал хIаллихшиннарду даврил лагрулий центрданул дуллуну дур 13676 лицензия, ихтияр дуллалисса 30 643 документ, 3338 охранникнал удостоверение.
Ярагъ ябуллансса ва лавсун занансса ихтияр дуллай бур 5 шинай. Ихтиярданул чIун лахъи дан аьркинну духьурча, ихтиярду дулайсса Центрданул отделениялийн аьрза булун аьркинссар хьхьичIмур ихтиярданул чIун дуккан 6 зуруя ца зуруйн бияннинсса чIумул дянив.
Центрданул буллусса ярагъуннил хIакъиравуса документру чIун дурккун махъ ишла баврихлу инсан жавабрайн уцай­ссар. Ярагъгу зевххуну, 5 азарунния 10 азаруннийн дияннин­сса аьчIа дишайссар ягу, ярагъгу зев­ххуну, 5-15 гьантлийсса дуснакь айссар.
Ярагъ лавсун занансса ихтияр духьурчагу, залуннан му лавсун занан къабучIи буллалиссар хIарчIсса чIумал, мажлисирттай, митингирттай, демонстрациярдай, диндалул, спортрал ва дялахърулул мероприятиярттай гьуртту хъана­хъисса чIумал.
Навруз ХIусайновлул мукунма бувсунни ярагъуннил хIакъиравусса закондалуву хьу­сса дахханашивурттая. Утти ярагъ машан ласун ихтияр да­къассар 21 шинавун къабивсса жагьилтурахь. КIийла ягу ххишала судрахьхьун агьну ивкIсса инсаннахьхьун, чIун ларгун, тахсир ливххун махъгу ярагъ ласунсса ихтияр къадуллалиссар.
ХIаписарнал бувсунни цукунсса шартIирдай ябан аьркинссарив ярагъ, бувчIин бунни ярагърансса ихтияр ласун ЦЛРР-нул отделлайн цукун буккантIиссарив.