Къучагъ­шиврул ордендалул заллу

Вай гьантрай «Лезги газет» редакциялул конференц-залдануву хьунни хасъсса аьра­лий операциялул гьурттучи, гвардиялул лейтенант, Къучагъшиврул ордендалул кавалер Исмяил МахIаммадовлущалсса хьунабакьаву. Дахьва аьралий училище къуртал бувсса жагьилнан цалчинсса гьантрайва гьуртту хьун багьну бур Украиннал аьрщарай нанисса хасъсса аьра­лий операциялуву.

Изюм шагьру ласлай, вайннал подразделениялун шанна гужсса рищаву дан багьну бур.
Ца талатавриву Исмяиллул канийн захIматсса щаву дирну дур. Цалва цанма цалчин­сса медициналул кумаггу бувну, цала буржгу бартбивгьуну, полкгу цIарава буккан бувну бур хIаписарнал. Ва тагьардануву ккаккан дурсса чувшиврухлу Исмяиллун Къучагъшиврул орден дуллуну дур.
Исмяиллул бувсунни журналистътурахь цала оьрмулия.

Увну ур ва Дарбант шагьрулий. Ванан 6 шин хьусса чIумал дунияллия лавгун ур ппу. Исмяилгу бава-ттаттачIан МахIачкъалалив ивзун ур.
Оьрмулул 13 шинаву увххун ур Тверьдайсса Суворовлул аьра­лий училищалувун. 2010-ку шинал мугу къуртал бувну, 2015-ку шинал оьрмулул 18 шинаву увххун ур Москавуллал лавайсса даражалул командный училищалувун.

Вагу арцул медальданий къуртал бувну, увкIун ур хъинну сий дусса Таманнал дивизиялул Севастополлал мотострелковый полкраву къуллугъ буллан. ДачIи шинава гьан увну ур Украиннал аьрщарайн хасъсса аьралий операциялуву гьуртту хьун.

ЦIана Исмяиллун 25 шин дур. Уттигъанну ванан увну ур арс. Исмяил ур каруннай бияврил спортрал мастер.
Къучагъшиву Исмяиллун ттаттахъаятура ирсирай дирсса духьунссар. Ванал ттаттал ппу Аьлимирзаев Апанни Буттал кIанттул цIанийсса Хъунмасса дяъвилий ккаккан дур­сса чувшиврухлу лайкь хьуну ивкIун ур ЯтIул ЦIукул ордендалун, «За отвагу» медальданун. Вагу разведроталул командирну ивкIун ур.