Усттаршиврун кьимат бивщунни

Пишакартал хIадур байсса Республикалул центрданий хьунни цIуллушиврул ссуссукьушиву дусса жагьилтурал дянив най бивкIсса «Абилимпикс» тIисса Миллатрал чемпионатрай хьхьичIунсса кIанттурду бувгьуминнан наградартту дуллалисса мажлис.

Шикку гьуртту хьунни ДР-лул кIулшивуртту дулаврил министрнал хъиривчу МахIаммад Аьби­дов.
– Жула республикалий чемпионат ялу-ялун машгьур хъанай дур. Ванийну исват хъанай бур, цIуллушиврул ссуссукьушиву ду­сса жагьилтурал гьунарду аьч баву мурадрай, вайннал хьхьичI цинявппа ххуллурду тIивтIуну бушиву. Му бакъассагу, хъуннасса аякьа дуллай бур мушакъатшиву дусса жагьилсса пишакартал давурттал дузал баврих», – увкунни МахIаммад Аьбидовлул.
Гьашинусса чемпионатрал бяст-ччаллу хьунни кIива форматрал лагрулий. Сентябрь зурул 19-нния 29-ннийн бияннин Аьрасатнал 84 региондалий очныйну ва манзилданул лагрулий най буссия 39 журасса пишардал усттаршиву ккаккан дуллалисса бяст-ччаллу.

Финалданул бяст-ччаллу бу­ссия Москавлив октябрь зурул 28-31-ннийн бияннин. Чемпионатрай «Ремонт и обслуживание автомобилей» тIисса номинациялуву гьуртту хьуну, хьхьичIунсса кIану бувгьуссар Дагъусттанная­сса жагьилсса пишакар Аьбдулмалик Кьурбановлул. Бяст-ччаллаву хьхьичIунсса кIанттурду бувгьу­сса жагьилсса пишакартурахьхьун ихтияр дуллунни «Россия – страна возможностей» тIисса платформалул лагрулийсса «Больше, чем путешествие» тIисса проектраву гьуртту хьунсса.