Дагъусттаннал ЗахIматрал ва социал лябуккулул министерствалул биялалийсса республикалул соцзащиталул 52 идаралий чялишну най дур «Социальный контракт» проектраву гьуртту хьун ччиминнал аьрзри кьамул баврил ва бувчIин бавурттацIунсса давуртту.
Вай идарарттай сакин бувну буссар проектраву гьуртту хьун буллусса аьрзри ххал бигьлансса хасъсса комиссия.
Дагъусттаннал БакIчи Сергей Меликовлул захIматрал министр АьвдурахIман МахIмудовлуйн ва муниципал идарарттал каялувчитурайн тапшур бунни социал проектрах хъуннасса къулагъас даву, мукунма кIицI лавгунни, санкцияртту баян бувсса, экономикалул захIматсса тагьардануву Дагъусттаннал агьалинан ва проект агьамсса хъанахъишиву.
«Социальный контрактрал кумаграйну агьалинаща бюхълай бур цала даву дайдишин, цивппа заллусса предприятияртту тIитIин», – увкунни Сергей Меликовлул.
Ялапаршиндаран минимумраяр чансса доходру дусса (11 515 къуруш) кулпатирттаща ва проектрайну бюхъантIиссар даража гьаз бан.
КьутIилул шартIирдайн бувну, хIукуматрал арцуйну ва цайми иширттайну кумагру буллай бур миски-гъаривсса кулпатирттан.
Дагъусттаннал БакIчинал хIукмулийн бувну, март зурул 29-ннийн бияннин соцзащиталул идарарттал дунни 3345 кьутIи.
ХIукуматрал чулухасса кабакьаврийну хIакьинусса кьини 1028 кулпатран кумагру бунни. Социал контрактраву чялишну гьуртту хьунни МахIачкъала, Хасавюрт ва Дарбант шагьрурдал агьали.
Дурну дур цивппа заллусса хозяйстварду тIитIаву мурадрайсса 818 кьутIи. Ва чулухуннайсса контрактравух гьуртту хьунни ЦIумадиял, МахIарамкантуллал ва Къумтуркъалаллал районнал агьали.
251 инсаннал дунни цалва пишалун хасъсса давуртту лякъаву мурадрайсса соцконтрактру. Ва чулухунмай хъунмурчIин гьуртту хьунни Дагъусттаннал Огнилул, Дарбантуллал ва Сулайман-Стальскаллал районнал агьали. Контрактрал лагрулий, давуртту ххал даву бакъассагу, кумаг буллай бур цIанасса чIумал тIалавсса пишарду лахьхьинсса кIулшивуртту дулун. Соцзащиталул идарарттайн бувкIсса инсантуращал зий буссар хасъсса пишакартал.
Ва контрактрал тIалавмур чулну хъанай бур инсантал захIматсса тагьарданува буккан баву. Ва чулухуннай дурну дур 1249 соцконтракт.
«Социал контрактраву» гьуртту хьун ччиминнаща бюхъайссар Республикалул ЗахIматрал министерствалул соцзащиталул кIантту-кIанттурдайсса идарарттайн аьрзри булун.
