ЦIанасса чIумал Ватсап дакъасса инсан нажагьсса акъа акъахьунссар. Ватсап дусса лакравугу марцIсса ккуллал лугъатрай гъалгъа тIисса, «лайк» бишин лахьхьин буллалисса чIиви душнил чIу бавссагу чIявусса бухьунссар.

Ванияр шиннардил хьхьичIра бавну, тти, цIунилла-цIунилгу группардавунгу, таксса инсанначIангу дукIлакIисса вай «голосовойрдал» чIиви заллу лахъи-ххишалану кIул уван ччан бивкIуна ттунгу. Ва лявкъунни лахъну зунттаву, Ккуллал шяраву, ялапар хъанахъисса Гудова Рая Сяидлул душ.

---

ЦIана 8 шинавусса Рая дуклай бур Ккуллал Халид Мурачуевлул цIанийсса №1 школалий 3-мур классраву. Гай хIазсса «голосовойрду» гьан дуллали­сса чIумал Раян диркIун дур 5 шин. Га диркIун дур, Лакрал жагьилтурал ккурандалул баян бувну, лакку мазрай назмурду дуккаврил конкурс дуллалисса чIун. Конкурсрай Раягу гьуртту хъанай бивкIун бур (гикку ванил 3-сса кIану бувгьуссар). Ттизаманнул чIяруми конкурсирттал хIасиллу видеордай бивхьусса «лайкирдал» ккалданийну дуллай бунавхьур, жунма кIулли, жула гъансса тIий, кIулсса тIий, жухьвагу «лайкру» бишара тIисса ишру къачансса шайшиву ва журалул конкурсру дусса чIумал. Мукунма конкурсрал чIумал Раягу бивкIун бур «лайк» бишайсса куц лахьхьин буллай: «Истаграмравун бувххун, лайк бихшин кIуллиии? КIялану дуриии гилусса любовь, ганий биза, ятIул дан, ятIул дувкун, га лайкри хъанайсса», – тIий, чIунийсса СМС гьан дуллай Ватсаправух.
– Бакреслив ялапар хъанахъисса жунма гъансса хъамитайпа бия телефондалувух Раяхь винма «лайк» бишинна тIийча, ганин му бишин лахьхьин буллалисса «голосовой» гьан дурна Раялгу. Га гъансса хъамитайпалул чIарав бивкIсса цамунил, вай хIаз дирзун, миккун-тиккун гьан дурну, хъиривмур кьинира дикъарсса кIану къаливчIуна, – тIий, буслай бур душнил буттал нину ПатIимат.

Раял вайми «голосовойрдурив» гьан дурну дур ваниннинна, оьрмулул 4 шин дусса чIумалла. ПатIиматлул, цуппа оьл ттивзуну бучIаннин, арснал душничIа, ва бялавхъун бикIан, цилла телефон кьаритайсса диркIун дур. Мукун, телефон дирирсса Рая гъан-маччами бу­сса группардавунгу, къагруппардавунгу гьан дуллай бивкIун бур «голосовойрду». Буруган, вичIи дишин хъирив къалавну бивкIссарив, ягу душнил гьан дуллалимуних къулагъас къадурссарив, гъан-маччаминнал цилва чивчумуних ургъил къадаву, цинна жаваб къадулаву бювхсса чIивитIул гьан дурну дур: «На чичле, вай мурцIу личIибухъул ттул сообщенияр­тту цибанни къаккалесса. Мугу-мурцIув личIибухъул, мурцIуха дуругле. Гьура­гъартал, ссихI дуккира, литIру», – тIисса «голосовойрду».
– Утти, хъунма хъанай, га чIумалнияр кIулши ххи хьусса Рая бур цилла голосовойрдая нач хъанай, къачичинссияхха тIий, – хъяй, буслай бур ПатIимат.
Раял бур 1-мур классравун заназисса Шюъванат тIисса ссугу. КIивагу душ ялапар хъанай бур буттал ппу Ма­хIам­мадлущал ва буттал нину Па­тIиматлущал. Душваврал ппу Сяид, проводник, лагайсса ур Москавливсса ва Санкт-Петербургливсса поездирттай. МахIаммад зий ур цала арснал душру заназисса Ккуллал 1-мур школалий кочегарну. ПатIимат къашавай-шавай буний, ванал кIивагу душнилссагу бувайсса бур, ванияр къалувну бакIругу зевххуну, школалийн биян буллай-буцлай.
Рая бур дуккавривугу, багьу-бизулувугу итххявхсса душ. За кIулсса, къакIулмунил хъирив хъап тIисса душ 1-мур классравун лавгун бур оьрмулул 5 шинавува. Ду­ккавривусса хьхьичIуннайшивурттахлу ва уттигъаннугу лайкь хьуну бур грамоталун. Дуккаврия, дарсирдая махъ заназисса кружокирттая тархъансса чIумал Рая буссар ичIаллил кушурдах, цила бу­ттал буттан ва буттал баван кумаг буллай. Буттал ниттил иникьаллул дукра дуллалисса чIумалгу цилла мюрщи карунних иникIма дуллай, ххункI буцIлай, хIала буххайссар ва. Дахьва 1-мур классравун лавгсса чIивимур ссих, Шюъванатлухгу, буругайсса бур, ванищал дарсру дуллай, ванин буккин-чичин лахьхьин буллай. Школалий хъанахъисса личIи-личIисса давурттавухгу хьхьичIунну гьуртту шайсса душ бур Рая.
Вана укунсса бур жулва лакку душ, оьрмулул бугьараминнан соцсетирдаву къуццу буван лахьхьин буллай, цинмавагу къакIулна лакраву машгьур хьусса чIивитIу Рая Гудова. Щак бакъар ва душния жунма вания тийнмайгу хъин чулий­сса хаварду баянтIишиврийн.