Ниттил кьини – вагу хъанай дур ца хIалу жула оьрмулуву язисса кIану бугьлагьисса ниттихъул барча буван, вайннахь ттюнгъасса махъру учин. Ниттихъул хъанай буну тIий хъиншиврул ва ххуйшиврул бакIщаращивну.

Ва чаннасса байрандалущал барча бунни цинявгу ниттихъул Ккуллал райондалул администрациялул бакIчи Шамил Рамазановлул:
– Ххирасса ниттихъул ва хIурмат бусса амудадахъул! Кьамул бара дакIнийхтунусса барча баврил махъру Ниттил байрандалул кьини!
Нинушиву – му лахъан къашайсса захIматри, вайннал дакIнийнугу, чурххайнугу бихьлахьисса. Цанбакъарча, ниттийн буну тIий хъар хъанай чIивитIул ялун бучIантIимур, муницIунма – щалагу обществалулмургу. Ниттил ччавур ва дунияллий­сса ххуйшиврул ва хъиншиврул лишан. Нинур хъанахъи­ссар чаннасса цIукуну, оьрмулул захIматшивурттавух бачин жунма кумаг буллалисса.
Ва байрандалул кьини хъунмур барчаллагь тIутIиссару виртталсса ниттихъахь, чIявусса оьрчIру тарбия буллалисса ниттихъахь, ятинсса оьрчIру бувцуну, миннах буруглагиминнахь ва чIявусса цайминнухьгу.
Ц1акьсса цIуллушиву ва талихI, дакьаву ва тирхханну зул кулпатирттан, гьарцагу гьантта ххаришиврул вибувцIусса хьуннав, чан къахьуннав зул чулухунмай гъан-маччанал хIурмат ва кьимат, – увкунни райондалул бакIчинал.

Ниттихъащалсса хьунабакьаву

Шамил Рамазанов Ни­ттил байрандалул кьини барча дуван хьунаавкьунни мобилизациялул хьун бувминнал ниттихъащал, кулпатирттащал, ссурвавращал. Вайннал арсрур буссагу хIакьину жула билаятрал мурадру бартбигьлай. Ва хьунабакьаврийн бучIан хьуну бакъая цинявппагу ниттихъаща. БакIчинал хIисавравун лавсунни гьарцагу ниттихъал, кулпатирттал ва ссурваврал мурадру.
– Нину – му яла хIурмат лаваймур махъри. Ниттихьри хъунмур бияла бусса оьрчIру цукунсса буккайрив, ваничIанну жува маслихIатрал хъирив лагайссагу, хъуни хьувкунни жунма ниттил увкумур тасттикь шайссагу. ХIакьинусса кьини зул арсру ва ласру виртталну дуручлай бур жула Ватан ва Донбасуллал агьлу. Вай виртталну буккаврил ца яла агьаммур бутIагу зур вайннаву бивхьусса. ЧIа тIий ура зул кулпатирттан цIуллушиву ва тирхханну. Амин Аллагь, зул ласру, арсру ва уссурвал цIуллуну-сагъну зана хьуннав ичIунмай, – увкунни Шамил Рамазановлул.
Барчаллагьрал махъру увкунни мукунма райондалул хъунаманал хъиривчу Анатолий Давдиевлул ва райондалул Культуралул управлениялул хъунмур Марина Ибрагьимовал.
ДакIний личIансса бахшишру ва тIутIивгу пишкаш дурну, муния махъмур мажлис хьунни ссупралухсса ихтилатирттайну.

«СаллатIнал ниттил дакI»

Ккуллал шяраваллил библиотекалий хьунни «Са­ллатIнал ниттил дакI» тIисса хьунабакьаву. Ваний гьурттушиву дан бувкIун бия ниттихъул ва амудадахъул, дуклаки оьрчIру.
Байран дачин дурну бия Аьйшат ХIажиева. Ванил, ниттихъул барчагу бувну, бувсунни нину тIисса мукъул мяъна-мурад цирив ва цуксса язисса рухIрив гьарцагу инсаннал оьр­мулуву. Ихтилатру бунни мукунма ниттихъал ва хъамаллурал. Хьунабакьаву «СаллатIнал ниттил дакI» тIисса духьувкун, Украиннаву хасъсса операциялий гьуртту хъанахъисса арсурваврал ниттихъахь увкунни барчаллагьрал махъру.

«Ябувара ниттихъул!»

КДЦ-лул Ч1явсса филиалдануву хьунни «Ябувара ниттихъул!» тIисса ххаллилсса акция. Ва мероприятиялул сиптачину бия филиалданул хъунмур СалихIат Алхасова. Ххирасса ниттихъан, амудадахъан хIадур дурну дия ххуйсса программа: назмурду, викторина-тIуркIурду, балайрду ва макьанну.
Аьзизсса ниттихъул, ссурвал ва амудадахъул барча бан бувкIун бия ЧIяйннал СОШ-багърал оьрчIру. Вайннал дур­ккунни дюххансса назмурду. Байран барча дуллай, махъру лавхъунни М. Айдаевал, С. Бугъраевал, А. Халилбаговал, М. Рамазановал. Доклад бунни СалихIат Алхасовал. Ванил балжину бувсунни Ниттил кьинилул тарихрая.
– Дагъусттаннай ниттихъал яхI-къириятрал, виричушиврул лавайсса кьимат буссар. ХIисавравун ласласиссар гьарцагу ниттил оьрчIру тарбия баву, миннал шаттирду хьхьичIунмай ласун буллали­сса хIарачат. Бугьараминнах бурувгун, жагьилсса ниттихъалгу цалами оьрчIру буттал буттахъал аьдат-эбадатирттай ябанссар тIисса умуд буссар. Яла захIматми чIуннардийгума жула зунттал хъамитайпалул, бакI лахIан къадурну, ци кьини дуккарчагу, яхI бувссар. Жула шяравугу буссар уздансса хъами – ниттихъул-вирттал, инвалидсса оьрчIру бусса ниттихъул, захIматрал ветерантал, щахъами ва цаймигу. Барча буллай цинявппагу, чIа тIий бура дакьаву ва паракьатшиву, – увкунни СалихIатлул.
Акция къуртал хьунни байрандалул ссупралух.

«Ниттил къюкI»

Хъювхъиял КДЦ-лул филиалдануву «Ниттил къюкI» тIисса мероприятие хьунни. Ва, хIадургу дурну, дачин дурну бия филиалданул хъунмур Рукьижат Оьмаева.
Ниттихъащалсса хьунабакьаву ва ихтилатру хьунни балайрду ва макьанну хIаласса. Оьрмулул бугьарасса ва жагьилсса хъами барча бунни назмурдайну, балайрдайну, къавтIавурттайну.
Барча баврил махъру лавхъунни Хъювхъиял СОШ-багърал хъунмур Аьйша Исяевал ва учитель Аздар Гъазиевлул. Махъру лавхъунни цайминналгу.
– Барчаллагь, жул ххирами! Ххуй-ххуйсса тIуллайну ва ттюнгъасса мукъурттийну зу, зула оьрчIал хъин битланнав, зул ялату чаннасса ссавгу, дунияллий дакьавугу чан къахьуннав, – увкунни Рукьижат Оьмаевал. БавтIцири рязину ливчIунни мероприятиялия.