Ноябрь зурул 29-нний МахIачкъалалив, «Россия – моя история» тIисса тарихрал паркраву, хьунни «Актуальные вопросы патриотического воспитания молодежи: поиск и решение» тIисса цIанилусса Щалагу Аьрасатнал форум.
Шикку гьуртту хьунни ДР-лул Халкьуннал Мажлисрал Председательнал хъиривчу Камил Давдиев, Дагъусттаннал национал политикалул ва диндалул иширттал министр Энрик Муслимов, ДР-лул БакIчиначIасса Хъунисриннал советрал председатель Ибрагьим Ибрагьимов, Дагъусттаннал паччахIлугърал педагогикалул университетрал ректор Нариман Асваров, «Россия –моя история» тарихрал паркрал фондрал каялувчи Тимур Велиханов, «Сильнейшая нация мира» тIисса Щалагу Аьрасатнал организациялул каялувчи Михаил Паллер ва цаймигу.
Форумрал даву дачин дурну бия Миллатрал политикалул ва диндалул иширттал министерствалул отделданул хъунмур Хасайбат Валиева.
Гьурттучитал барча буллалисса ва форумрал даврил агьамшиву кIицI лаглагисса ихтилат бунни Камил Давдиевлул.
«Ялун нанисса ник тарбия даврин укунсса мероприятиярду даврийну хъунмасса мюнпат буссар. ХIакьинусса кьини Украиннаву нанисса хасъсса аьралий операциялуву чувшиву ккаккан дурсса Аьрасатнал Виричу НурмахIаммад ХIажимахIаммадов цинявппагу жагьилтуран эбратну хъанахъиссар. Аьралий операциялуву гьуртту хъанахъиминнангу Виричунал дурсса къучагъшиврул аьралий бурж бартбигьлансса гьавас бутлай бур», – увкунни Камил Давдиевлул.
ДР-лул БакIчи Сергей Меликовлул чулуха форумрал гьурттучитал барча бунни ва, цIанасса ппурттувусса иширттацIун бавхIуну, форумрал хъуннасса мяъна-мурад душиву кIицI лавгунни Энрик Муслимовлул. Ванал цала ихтилатравугу чIурчIав дунни жагьилтал Ватан ххирану, жула тарих кIулну ва мунил кьадру-кьимат буну тарбия буллан аьркиншиврий.
«Жува гьарица шинал, май зурул 9-нний, лавайсса даражалий тIайла дуклай буру Бюхттулсса Ххувшаврил байран. Аммарив жува тачIав кIицI лаглай бакъару Аьралуннал хъунаманал цIа. Сталинград шагьрулунгу дизарду Волгоград тIисса цIа. Сислай бакъару Бюхттулсса Ххувшаву ларсъсса хIукуматрал каялувчинал цIа кIицI лаган. Бурвав цайми хIукуматирттайгу, жулва кунма, тарих ссуссукьу буллалисса ишру?» – увкунни Энрик Муслимовлул.
Ибрагьим Ибрагьимовлул кIицI лавгунни, дунияллий хъанахъисса дахханашивурттацIун дархIуну, жагьилсса никирахь насихIат бусаву мурадрай дурсса мероприятие чара бакъа аьркинсса душиву.
«Сильная нация мира» идаралул каялувчи Михаил Паллердул ихтилат бия жагьилтал тарбия баву мурадрай идаралул дачин дурсса давурттаясса.
Форумрай ихтилатру бунни Нариман Асваровлул, ДР-лул БакIчиначIасса Хъунисриннал советрал член Айгум Айгумовлул, ДГПУ-рал хасъсса кIулшиву дулаврил факультетрал декан ПатIимат Оьмаровал, Аьрасатнал Виричу НурмахIаммад ХIажимахIаммадовлул ниттил Сапижат Мазаевал, Ихтиярдал академиялул студентка Александра Полищуклул.
Ахирданий форумрал гьурттучитурал ххал диргьунни тарихрал паркраву тIиртIусса «Украина. На переломах эпох» тIисса Аьрасатнал ва Украиннал арардая бусласисса выставка.
