Халкьунналмур ядуллалиминнансса премия

МахIачкъалалив ларгсса нюжмардул ахирданий хьунни Дагъусттан Республикалул ХIукуматрал «Дагъусттаннал дакI-ттиликI» («Душа Дагестана») тIисса цIанилусса премиялун ва шинал лайкь хьуми барча буллалисса мажлис – гала-концерт. Ванил сакиншинначиталну бия ДР-лул Культуралул министерство ва Республикалул Халкьуннал творчествалул къатта.

Гала-концертрай гьуртту хьуна «Дагъусттаннал дакI-ттиликI» премиялул ва шинал лауреатътал, мукунма республикалул творчествалул коллективру ва таксса балайчитал.
Шадлугърал дайдихьу дурна ДР-лул культуралул министрнал хъиривчу, Республикалул Халкьуннал творчествалул къатлул директор Марита МухIадовал. Республикалул культуралул министр Зарема Буттаевал цIаниягу, цилва чулухагу ванил барча бувна лауреатътал ва чIа увкуна вайннан халкьуннал багьу-бизу, аьдатру дуруччаврицIун дархIусса бусравсса давриву гихунмайгу тIайлабацIу.

«Душа Дагестана» премиялул 8 номинациялий ххув хьусса 15 инсаннал сияхIрай бур лакрал шаннагу райондалул вакилталгу: Лакрал райондалиясса Шамсият Какваева – Саэд ХIабиевлул цIанийсса халкьуннал театрданул режи­ссер, «Халкьуннал театр» номинациялий; Ккуллал райондалиясса МахIаммад Ибрагьимов – халкьуннал фольклорданул «Бартукь» ансамбльданул солист, «ЧIава гьунарчи» номинациялий; ЦIуссалакрал райондалиясса Башарат МухIадова – фольклорданул «Дараччи» ансамбльданул каялувчи, «Халкьуннал аслийсса культура» номинациялий. Премиялул ва шинал лауреатътуравух мукунма бур Каспийскалиясса Башикар Вагьабовагу, жагьилтурал «Наследники» коллективрал художествалул каялувчи, «Халкьуннал аслийсса культура» номинациялий.

Шиккува кIицI лаган, ва премия дуллалиссар 2012-ку шиная шийннай. Вай шиннардил мутталий премиялун лайкь хьуссар 142 инсан. «Душа Дагестана» хъанахъиссар Щалагу Аьрасатнал ПаччахIлугърал «Душа России» тIисса премиялуха лархьхьуну цIакь дурсса бахшиш.

Премиялун лайкь хьуминнахь ва барчагу тIий, чIа тIий буру ванияргу ларайсса хьхьичIуннайшивурттайн лахъаву.