Ноябрьданул 29-нний хьунни ДР-лул шяраваллил хозяйствалул министрнал цалчинма хъиривчу Шарип Шариповлул пресс-конференция.
Мунал тIимунийну, ятту зунттал лухччая кIинтнил даэрдайн куч бувну къуртал шавай бур. Республикалул циняв аьрщарал 86% хIисавну дур шяраваллил хозяйствалул аьрщаран, миннувату 2,7 млн гектарду –ризкьилул лухччив дур. Мунияту региондалул экономикалуву ризкьи баву ккаллину дур приоритетссаннун.
«Жула кIинтнил лухччив цаппара кIанттурдай къундалухьхьун лаглай дур, уртту дурагу къаххяхлай. Мунил сававртту дур ацIрахъул шиннардий къурагъну личIаву, марчру бишлашаву, цаппара ризкьичитурал лухччай чIявусса ятту-гъаттара ябуллалаву щаллусса шинал мутталий. Гьамин, мунияту 2022-ку шинал ДР-лул Шяраваллил хозяйствалул министерствалул хIарачатрайну цила чIумал кIинтнил къутанная куч бувну бивкIссар 98% циняв ризкьилул. ЦIанасса ппурттуву ятту зана хъанай бур ми кIанттурдайн, тикку уртту хъанай духьувкун», – бувчIин бунни Шарип Шариповлул.
Пресс-конференциялий мукунма гьаз бунни ятту бачайсса ххуллурдай закондалуцIун бакъавкьуну объектру баврил масъалагу. Шарип Шариповлул бувсунни ДР-лул Минсельхозпродрал Минимуществалущал цачIу предложенияртту хIадур дуллай бушиву цIусса яттиххуллурду баврил хIакъираву.
Министрнал цалчинма хъиривчунал мукунма бувсунни ятту ххуллийн бувккун махъ хIухчалтращал архIал ятту чан къашаврил ялув бацIайсса бушиву районнал шяраваллил хозяйствалул управлениялул ва Дагъусттаннал Ветеринариялул комитетрал зузалт.
Шарип Шариповлул бувсунни цIанасса ппурттуву Дагъусттаннай бушиву 4 млн ва 660 азарва бакI яттил ва цIурттал. Му ккаккиялун хасну республикалул цалчинмур кIану бугьлай бур Аьрасатнал циняв субъектирттаву. Региондалий бур 950 азарва хъуни гъаттара ва 476 азарва оьл. Му чулухатугу жула региондалул бугьлай бур цалчинмур кIану билаятрал регионнаву.
