Итникьини Дагъусттан Республикалул ХIукуматрал хъунаманал хъиривчу Рамазан ЖахIпаров хьунаавкьунни Гвардиялул лейтенант, взводрал командир Исмяил МахIаммадовлущал.

МахIарамкантлиясса Исмяил МахIаммадов Украиннал аьрщарайсса талатавурттаву гьуртту хъанай ур хасъсса аьралий операция байбивхьуния шийнай.
ДакIнийн бутанну, душманнал мюхчаншиврул куртIнивун дурххун наниххуллий Исмяил МахIаммадовлул каялувшиндаралусса танкрал взводран хIисав хьуну дур янна-ярагъуннил далгусса украиннал боевиктурал кьюкьа. Цайнна вихшала дурсса взводращал га хIадур хьуну ур гьужумрайн. Душманнал Аьрасатнал аьралуннайн минометрава цIу итадаркьуну дур. ЛичIлулсса дагъусттанчувнаща бювхъуну бур цала взвод минометрал чявхълува дуккан дан.

Амма хIаписарнал канийн кIусса цIалцIи щуну дур. Цанма цала цалчинсса кумаггу бувну, лейтенантнал, гьужум бяличIан къабивтун, шяравалу мурахас дурну дур.
Душманнал гужру кIулсса лейтенантнал найдунура цIу дирхьуну, неонацистътал бухлаган бувну бур.
Хасъсса аьралий операциялуву ккаккан дурсса чувшиврухлу, къучагъшиврухлу ва жард къаучаврихлу, Аьрасатнал Президент Владимир Путиннул указрайн бувну, Исмяил МахIаммадовлун дуллуну дур ларайсса награда «Чувшиврул орден».
Дагъусттаннал БакIчи Сергей Меликовлул барчаллагь баян бунни Исмяил МахIаммадовлунгу, ва кунма душмантурая буттал кIану бурувччусса жула ппухълуннан лайкьну Ватандалул цIаний жан дулун хIадурсса цаймигу жула арсваврангу.