Лавгунни шинал чIуннаву ца яла яргмунин ккаллисса ссутнил шанмагу барз. ХьхьичIрив – шинал яла кIяламур чIумул шанма барз. КIинтнил чIун чIявучил дархIуну дикIай дякъицIун, бивщусса мурчацIун, ччех бикIлакIисса ххуллурдацIун, бявкъу-гъили шаврицIун. ЧIявучингу, бюхълай бивкIссания, инттухуннин кьатIув къабувккун, шаппа гъилишиврий ччанссия. КьатIу-шав, давурттайн тIий, цайми-цайми иширттай тIий, букъавккун яхьун шайсса тагьаргу дакъахьувкун, жува, бюхъавай, бякъакъинсса, къашай-шай къахьунсса хIарачат барча хъинни.
Дякъийн, кьатIу-шав буккан хьхьичI
дукияра калориярттал авадансса дукра.
* * *
Дяркъусса чIумал яла-яла ялув бацIияра кьинилул режимрал, чIумуй уттубихьлай, чIумуй бизлай.
* * *
Дякъийн, кьатIу-шав буккан хьхьичI дукияра калориярттал авадансса дукра. Амма кьатIув букканнин кIирисса чяй ягу кофе къахIачIавривур хIисав дусса. Вай шаппай зана хьуну махъ хIачIан диртун хъинссар.
* * *
КьатIув хъунмасса хIаллай нанисса чIумал, малаххари муххал чIюлушиннарду (кIисса, каниш, вичIилусру, м.ц.). Вайннул, цирдагу ччяни дяркъуну, жулва бурчугу бякъин буллалиссар. Каруннайсса кIиссурттал оьтту багьайсса куццуй щурунгу къабитлатиссар.
Вара сававрайн бувну, муххал оправа дусса яруннин кIанай, кIинттул контактный линзарду ишла дурну хъинссар.
* * *
Малаххари къумасса усру, вайннуву ччанну ччяни бяхълан бикIайссар. КIинттулсса усру дикIан аьркинссар цахъис гьарттассагума.
* * *
Мурчая, дякъия лажин ларитан аьркинни, амма жува ласласисса ссихIирал хъатан дурсса шарфирал ва катIрал бурчу лигьин бувангума бюхъайссар.
* * *
Дякъий, мурчай ссихI ласласияра майравух. СсихI ласласавугу дикIан аьркинссар хъинну куртI дакъасса, цалийсса, паракьатсса.
* * *
КъатлучIансса ягу давричIансса манзил архсса буну, нанинийн бияннин зува биялну бяхълахъисса хIисав хъанай бухьурча, гъили хьун буххияра чун-бунугу – ттучандалувун, аьпттикIравун.
