Аьрасатнал ва Украиннал арарду аьч дуллалисса выставка

МахIачкъалалив, «Россия – моя история» тарихрал паркраву, хьунни «Украина. На переломах эпох» цIанилусса выставка. Экспозициялул материаллал буслай бия Украиннал тарихрая, 17-мур ттуршукулия шихуннайсса Аьрасатнал ва Украиннал арардая.

ЧIяруми материаллу дия хьхьичIра-хьхьичI ккаккан дуллалисса. Ва проектрал мурад бур аьвзал заманнуя шихунмай­сса тарихрая бусаву, цIана хъана­хъисса иширттал мархри ча най буссарив аьч баву.

Выставкалийн бувкIсса тамашачитуран кIул хьунни Новороссиялул тарихравасса чIявучин къакIулсса затру. Масала, «Украина» тIисса махъ цукун сакин хьусса махъ буссарив, Аьрасатнаву украинцы щийн учайсса бивкIссарив. Бувсунни тарихрал личIи-личIисса ятIапIирттай цайми хIукуматирттал славяннал дуниял бутIрайх дачIин кьаст лавхIусса иширттая. Экспозициялул материаллава ва гиднал бусласимунива тамашачитуран кIул хьунни Буттал кIанттул цIанийсса Хъун дяъвилий Украина душманная мурахас буллай чIявусса оь экьибутIин багьшиву совет халкьуннан. КIул хьунни Хъун дяъвилул вирттаврая ва нацистътурал чул бувгьусса бандеровцыная. Выставкалул экспозициялуву, тарих аьч буллалисса ляличIисса, нажагьсса суратру, видеоматериаллу, кинохроника дакъассагу, дия картартту, плакатру ва чIявусса архиврал документру.

Выставкалул экспозициярттая тамашачитурахь буслай ия Тарихрал паркрал лектор-экскурсовод Микьдад Къаяев.
Выставка МахIачкъалалив най дикIантIиссар 14 гьантлий.
Ва выставкалул х1акъираву гьарза-гьартану жу чичинну хъиривсса номерданий.