Миллатирттал мазру лахьхьаврил семинар

Ноябрь зурул 21-нний хьунни МахIачкъала шагьрулул школардай ниттил мазрал дарсру дихьлахьисса учительтурансса семинар-совещание. Ва хас дурну дия РСФСР-данул ва ДАССР-данул лайкь хьусса ишккакку, филологиялул элмурдал доктор, Дагъусттаннал мазурдил ахттарчи Унайзат Майлановал аьпалун. Шикку гьуртту хьунни «Каспий» академиялул ректор МахIаммад Абакаров, ДГПУ-рал проректор Руслан Гереев, АьФ-лул лайкь хьусса ишккакку, ДГПУ-рал профессор, Дагъусттаннал халкьуннал артист Хан Баширов, Ниттил мазру лахьхьаврил центрданул директор Марина ХIасанова, Аь.Тахо-Годил цIанийсса Дагъусттаннал НИИП-рал ниттил мазурдил секторданул хъунмур пишакар Светлана Мутаева ва шагьрулул школардал ниттил мазурдил дарсирдал учительтал.

Семинарданул даву дачин дурну ия МахIаммад Абакаров. Гьуртту хъанахъисса цинявппагу пишакартал бия ниттил мазурдий дакI цIуцIисса, ми буруччаврил буруккинттарайсса. Ихтилатругу бия мюрщи миллатирттал мазру бухлаган къабитансса чаранну лякъавриясса.
Мюрщи миллатирттал мазру бухлаган къабитансса агьамсса ххуллурдуну кIицI лавгунни миллатирттал мазурдийсса СМИ-рдал даву хьхьичIуннай даву ва школардай ниттил мазрал дарсру дишаву. Ниттил мазрал дарсру дихьлахьисса учительтурал масъалартту кIицI лавгунни Марина ХIасановал. Ванил бувсунни ниттил мазру лахьхьаву ва ми хьхьичIунмай баву мурадрай центрданул дачин дурсса давурттая. Мукунма кIицI лавгунни махъсса ппурттуву школардай ниттил мазрал дарсру чан даврийну укунмагу бухлавгун нанисса мазру буру­ччаврил ялун хъуннасса нигьачIаву диллай душиву.

«Вай махъсса шиннардий ва масъалалия гъалгъа тIийнма бушиврулгу тасттикь буллай бур жула маз бухлагансса нигьачIаву душиву. БувчIлачIисса зат бур, мазурдийн биллалисса бала бацIан баншиврул, хьхьичIра-хьхьичI миннул хIакъиравусса закон кьамул дан аьркиншиву. Школардай ниттил мазрал ОГЭ ва ЕГЭ дуллали бан аьркинни. Ниттил мазрал дарсру дихьлахьисса учительтуравун зунсса гъира-шавкь рутлан аьркинни», – увкунни Марина ХIасановал.
ХIакьинусса кьини шагьрулул школардай лакку мазрал дарсру дишаврил тагьарданун хас бувну бия Светлана Рамазановналмур ихтилат. Ванил кIицI лавгунни ниттил мазру лахьхьаврил тагьар ххуйну дакъашиву,чIявусса кулпатирттаву лакку мазрай гъалгъа тIутIаву кьюкьалану душиву.

«Жува гьаз буллалисса ма­съалартту цайми мазурдивугу хьунабакьайхьунссар, амма, ттунма чIалачIиссаксса, яла ххуй дакъамур тагьар лакку мазрал дур. Инсантал зунттава шагьрурдайн бизавугу ниттил мазрай гъалгъа тIутIими чан шаврил ца багьана хъанай бур. Лакку маз лахьхьин ччисса, лакку мазрал дарсру дихьлан ччисса дуклаки оьрчIру чан­сса бур. ХьхьичIва-хьхьичI ниттил мазрал кюру ужагърай бикIан аьркинссар. Маз бухлагайсса, муний гъалгъа тIутIисса инсантал бухлавгукунни. Маз лахьхьинсса гъира-гьавас буссакссар му ябан хьунтIисса. Маз яхьуншиврул муний ва мунияту гъалгъа тIийнма бикIан аьркинссар. Цал уттигу тикрал бан ччай бура, маз буруччавриву хъуннасса хъар лахълахъиссар кулпатрал ва кIулшивуртту дулаврил идарарттал», – увкунни Светлана Рамазановнал.

Ихтилатру буллалиминнал хъунмурчIин кIицI лавгунни шагьрулул школардай ниттил мазру лахьлансса луттирду итабакьлай бакъашиву.
Совещаниялул даврил хIа­силлу дуллай, маслихIат ккав­ккунни шагьрулул школарттай ниттил мазрал дарсру дихьлахьи­сса учительтурал квалификация ларай даву мурадрайсса курсру тIитIинсса.