Ларгсса нюжмардий лакрал хъаннил оьрмулуву дакIний личIансса ишру хьунни: Дагъусттаннал муфтиятрал просвещениялул хъаннилмур отделданул ва «Гьидаят» тIисса центрданул вакилтурал сипталийну, ЦIуминалийсса ЦIуссалакрал шяраву хьунни хъаннил мажлис.
КIицI лавгсса идарарттал душваврал бувсунни исламрал диндалул ххуллу цIакьну буруччин аьркиншиврия ва му давриву хъаннилмур биялагу агьамсса бушиврия, жяматрал оьрмулул иширттавухгу хъами чялишну гьуртту хъанай бушиврия, кулпатирттаву инсаншиврул кьимат хьхьичIунну бикIан аьркиншиврия, исламрал кIулшивуртту куртIгу, цIакьгу дулларча, оьрчIру бяйкьусса ххуллийн къабуккантIишиврия.
Махъру лавхъминнал балжисса жавабру дуллуна буллалисса суаллахьхьунгу. Ххадижа Аьбдуллаевал бувсуна, исламрал дингу дуручлай, адаврай къуццу тIутIисса инсан махъминнангу эбратну хъанахъишиву. Вара мяъна-мурадрайсса ихтилат бувна цайминналгу. Мажлисрал программа авадансса дия: увкуна нашидру, дурккуна назмурду, дурна викторинарду, дуруна дуаьрду. Ахирданий райондалул активисткахъан ЦIуминалийсса Имамтурал советрал хъунама Мансур Хаваевлул Барчаллагьрал чагъарду ва тIутIал кацIру буллуна.
КIилчинмур мероприятие Дарбантуллал шагьрулуцIун дархIусса дия. КIава Муфтиятрал просвещениялул хъаннил отделданул зузалт Ххадижа Аьбдуллаевал ва Эльмира Нуруттиновал хIарачатрайну лакку хъами бивуна Дарбантлив МухIаммад Идавсил (с.аь.с) чIарахбизулт бувччуну бусса зияратрайнгу, Дарбантуллал аьвзал заманнул мизитравунгу, экскурсия бувна Нарын-Къалалийнгу.
Ва аьрххилухлу душру барчаллагьрай бур МахIачкъалаливсса Сайпуллагь-Кьади Башларовлул цIанийсса мизитрал имам МухIаммадрасул МахIадовлуйн ва Дарбант шагьрулул просвещениялул отделданул хъунмур Ххадижат Аслановайн.
