Ноябрь зурул 18-нний Буйнакск шагьрулул Тарихрал ва краеведениялул музейраву хьунни халкьуннал композитор, музыкант, учитель, Жяъпардул арс Ахкуев Ибрагьимлун 95 шин шаврин хас дурсса мероприятие.
КIанттул агьулданун ва кIулссар шагьрулул гимнран ккаллисса «Буйнакскаллахасса балайлул» автор хIисаврай. Шагьрулул мэр Исламуттин Нургудаевлул бувсунни Ибрагьим Жяъпарович бусалардавун агьсса инсан ушиву, профессионал композитор къаивкIхьурчагу, гьунар бусса, халкьуннал ччаву лайкь дурсса ивкIшиву, ванал Буйнакск шагьрулухасса балай кьатIаллил билаятирттайгума машгьурну бушиву. Бувсунни ва балайлул тарихгу. Ибрагьим Ахкуевлул цалва бувсмунийн бувну, 1966-ку шинал ванан хьунаавкьуну ур Лениннул цIанийсса бульварданий СССР-данул халкьуннал учитель Булач ХIажиев. «Ттул гьалмахчунал, Ленинградраясса солдат-срочник Гена Смеховлул жулва шагьрулия ххуйсса назму чирчуну дур.
Макьан ляхъан дан хьунссияв?» – цIувххуну бур Булач Имадуттиновичлул. Ца зуруйсса хIарачатрал хIасиллал барачат хьуну, дунияллийн бувккун бур совет эстрадалул машгьурсса чаннацIурттал Муслим Магомаевлул ва Эдита Пьехал личIи-личIисса шиннардий увкусса «Буйнакскаллахасса балай». Ва балай таний цалчин увкуну бур Буйнакскаллал 1-мур школалий 8-мур классраву дуклакисса Рая Бамматовал. Яла, махъату, вания хьунтIиссар Дагъусттаннал булбул, опералул балайчи, Аьрасатнал лайкь хьусса артистка.
Ибрагьим Ахкуев чIярусса шиннардий зий ивкIун ур Буйнакскаллал 1-мур гимназиялий. Дагъусттаннал халкьуннал артист, Аьрасатнал магьирлугърал лайкь хьусса зузала, Аьрасатнал ва Дагъусттаннал паччахIлугърал премиярттал лауреат Хан Башировлул, музыкалул композиция дуциннин, бувсуна Ибрагьимлущалсса цалла дусшиврияту.
ОьрчIал музыкалул школалул преподавательтал, Ума Алхасовал, Светлана Лосьлул музыкалийсса композицияртту бахшиш дурна хъамаллуран. Хъамаллуравух бия Халкьуннал Мажлисрал депутат Илияс Мяммаев, Аьрасатнал лайкь хьусса учитель Асият Аьлиева, музейрал директор Микаил Дугъричилов, Мариян Илиясовал цIанийсса «Дараччи» фондрал Президент Гульшан Хасаева, хореограф, балетмейстер, Дагъусттаннал искусствардал лайкь хьусса зузала Тарият Къапиева.
БавтIцириннахь щалвагу Ахкуевхъал агьулданул цIанияту барчаллагь тIисса ихтилат бувна чичу, аьлимчу, профессор Жанна Абуевал. «Ттун хъинну ччай бия ва мероприятие, жува, совет заманнай кунма, ккуркки лавгун, тIааьнну, гъилину ларгун, мукун хьугу-хьунни. Ибрагьим Ахкуевлул жува цачIун батIин бунну, жулва шагьру аякьалий ябан оьвтIисса аманатрал дуаьгу чIюхлай дур ванал макьандалува ва Геннадий Смеховлул ххуттардива», – увкуна ванил.
Ахирданий Буйнакскаллал мэр Исламуттин Нургудаевлул бувсунни шагьрулул цания ца кIичIираваллин Ибрагьим Ахкуевлул цIа дизансса хIукму бувшиву. Бусан ливчIунни, ва бивкIу бакъасса балай машгьурсса балайчитал, Тимур Темировлул ва ХIусайн Манаповлул учайшиву утти.
