Ларгсса нюжмардий Дагъусттан Республикалул А.Тахо-Годил цIанийсса Национал музейраву тIиртIунни СССР-данул халкьуннал артист, композитор, Аьрасатнал захIматрал Виричу Мурад Къажлаевлун хас дурсса выставка. Ккаккиялун дирхьуну дия ваниннин чIявучин къаккарксса, цIа дурксса композиторнал цалла фондравасса затру.
Выставка тIитIлатIисса шадлугърай гьуртту хьуна ДР-лул культуралул министр Зарема Буттаева, ДР-лул Композитортурал союзрал председатель Рамазан Фаталиев, ДР-лул Чичултрал союзрал председатель МахIаммад АхIмадов ва цаймигу.
Зарема Буттаевал цилва ихтилатраву кIицI лавгуна ва выставкалийну, анжагъ композиторнал оьрмулия ва творчествалия кIул шаву бакъассагу, Дагъусттаннал ва Аьрасатнал музыкалул культуралул тарихравасса чIяву-чIявусса затру кIул хъанай бушиву.
– Жуннасса багьа бищун къашайсса хъусну хъанахъиссар музейравун буллусса композиторнал цалва рояль, дагъусттаннал цалчинсса балетран ккаллисса «Горянка» балетрал партитура, суратру, Мурад МахIаммадовичлун ва хъамакъабитайсса ванал кулпатран Валида Исламовнан хасну чивчусса живописьрал произведенияртту, дунияллул личIи-личIисса билаятирттай вайннан дурсса бахшишру ва сувенирду, паччахIлугърал чулухасса наградартту ва чIярусса цаймигу затру. Ва залданул чIирттаву вайннул цамур куццуйсса оьрму байбишинтIиссар, шивун бувкIминнан, хаснува жагьилтуран, хъуни гьунардал эпохалия, республикалул ва билаятрал хазнану хьусса ххаллилсса музыкалия буслай, – увкуна ванил.
Мурад Къажлаевлул цалвагу бувсуна цаппарасса экспонатирттал тарихрая, вайннувух, Гъумук бакъа бувну, махъату, лявкъуну, зана бувсса, кулпатрал граммофондалия, цанна 50 шин хъанахъисса чIумал ниттил Еленал пишкаш бувсса рояльдания.
Мурад Къажлаевлун хас бувсса экспозиция музейраву муданма бикIантIиссар.
