Ноябрь зурул 16-нний увссар жула хъунасса композитор, Аьрасатнал халкьуннал артист, Дагъусттаннал ва Аьрасатнал ПаччахIлугърал ва ХIукуматрал премиярттал лауреат, Дагъусттан Республикалул цалчинсса гимнрал автор Ширвани Чаллаев.
Ширвани Чаллаевлул чивчуну бур урчIва опера: «Горцы», «Маугли», «Король Лир», «Наследство», «Кровавая свадьба», «Хаджи-Мурат», «Читая дневники поэта», «Казаки», музыкалул къямадия «Странствия Бахадура», кIива балет, кIира симфония, кьуния цара концерт, камерный, симфонический ва чIунил музыкалунсса чIявусса произведенияртту, «Канатоходец» (1972), «Тайна синих гор» (1981), «Сказание о храбром Хочбаре» (1987), «Ласточки прилетели» (2006) кинордансса ва чIявусса театрал постановкарттансса музыка.
Ларгсса шинал кIицI ларгсса 85 шинал юбилейран хасну, Дагъусттан Республикалул Культуралул министерствалул кабакьаврийну, МахIачкъалалив хьунни композиторнал музыкалул кIира концерт.
Ноябрь зурул 17-нний Къумукьнал театрдануву хьунни камерный музыкалул концерт. Му цурдагу дия Дагъусттан Республикалул Культуралул министерствалул кабакьаврийну паччахIлугърал филармониялул дуллалисса «Творческие пересечения» тIисса ттизаманнул музыкалул форумрал лагрулий.
Афанасий Фетлул, Сергей Есениннул, Адаллол мукъурттийсса композиторнал произведенияртту щаллу бунни Аьрасатнал халкьуннал артист Алексей Мочаловлул, Покровскийл цIанийсса Москавуллал академический камерный музыкалул театрданул хьхьичIунсса балайчи Ирина Чаллаевал, «Голос» тIисса Щалагу Аьрасатнал конкурсрал гьурттучи Михаил Жигалевлул, дунияллул халкьуннал дянивсса конкурсирттал лауреат Роман Момрыгал (виолончель), дунияллул халкьуннал дянивсса премиярттал лауреат Людмила Духаннул (фортепиано), Гнесиннул цIанийсса Музыкалул академия къуртал бувсса Гулбарият ХIусайновал (фортепиано). Ва Ширвани Чаллаевлул ссил Гулбариятлул арснал душри.
Концертрая махъ, маэстрол лагма лавгун, суратру ришлай бия композиторнал творчество ххирами. Вайннавасса ца, Кьункьиял шяраватусса жагьил АхIмад Курбановлул, Ширвани Чаллаевлул творчествалухсса эшкьилул цува лакку маз лахьлай айивхьушивугу кIицI лавгун, бувккунни композиторнан хас бувну лакку мазрай чивчусса шеъри.
Ноябрь зурул 19-нний Оьруснал театрданул хъунмур залдануву хьунни кIилчинмур концерт. Концертрал программалий Дагъусттаннал Опералул ва балетрал театрданул симфонический оркестрданул ва хорданул щаллу бунни Миясат Муслимовал «Никола Пиросмани» циклданувасса кантата. Дирижер – Дагъусттаннал халкьуннал артист Новруз Шахбазов, хормейстер – Эмилия ШихрахIимова, солистал — Алексей Мочалов, Ирина Чаллаева, Михаил Жигалев, Эльмира Маммадаева.
МахIаммад-Загьид Аминовлул мукъурттийсса кIива балай увкунни Дагъусттаннал халкьуннал артистка Лариса ХIажиевал.
КIирагу концерт дачин дурну бия Дагъусттаннал паччахIлугърал филармониялул каялувчи Ирина Нахтигаль. Ванил бувсуна композиторнал творчествалия.
ДакIнийн бутанну, ларгсса шинал композиторнал юбилейран хасну П.И.Чайковскийл цIанийсса Москавуллал паччахIлугърал консерваториялул Рахманиновскийл залдануву хьуссия хъуннасса авторский концерт «Времена года» тIисса, Москавуллал камерный оркестрданул, Большой театрданул хорданущал цачIуну.
