Бухьхьияра лакку мазрал диктант чичин

Декабрь зурул 2-нний, ахттайнмай ссят цанний, МахIачкъалалив «Россия – моя история» тIисса тарихийсса паркравун батIантIиссар гьашинугу чIявусса лак, лакку мазрайсса хъун диктант чичин.

ДакIнийн бутанну ларгсса шинал регистрация дурсса 220 инсан ивкIшиву, аьмну культуралул программа кка­ккан дуван, миллатирттал майданнайну диктантрал кьини хъун дан бувкIцириннащал архIал 300-ннийн бивсса инсантал бивкIшиву. Диктант чичин бувкIун бия МахIачкъалаливсса, Къизилюртраясса, Буйнакскалиясса, хIатта Хасавюртлиясса ва цайми шагьрурдаясса лак, ЦIуссалакрал, Лакрал районнаясса делегациярду. Гьашинугу, диктантрал лак вава даражалий, ванияргума хъунну цачIун буванссар тIисса умудрай, жу оьвтIий буру зуйн, бухьхьияра тIий. Диктант чирчуну махъ кьиматру бишлашисса аваза къабувансса хIукму Сакиншиннарал комитетрал. Диктантру чирч­сса чIапIив датIинтIиссар, гьай-гьай. Амма зуща гьарманаща хьунтIиссар зура чирчусса диктантрал сурат рищун мобильникрал кумаграцIух. Чирчусса диктант яла ххал дувантIиссар сценалий проекторданий. Зуща хьунтIиссар зулла диктантраву итабавкьусса гъалатIирттах къулагъас дуван, зунма зува аьдилну кьиматру бишин. Сакиншинначитурал активращарив — лакрал лакку мазрайсса диктантрал хIасиллу дуван. Лакран ла­кку маз кIулшиву ци даражалий бурив хIисавравун ласун. Диктантрал гьанумур мурадгу варихха. Бусан аьркинни диктантран­сса текстрал автор лакрал хъунасса чичу, гьашину дунияллия лавгсса, лакрал прозалул ва драматургиялул ххазина жунма кьабивтсса Казбек Мазаев ушивугу. Диктант чичаву дакъа, цаймигу бахшишру дуссар. Лакку мазрайсса луттирдал выстака, лакрал суратру зунттал халкьуннал оьрму, ичIаллил багьу-бизу чIалачIи буллалисса суратирттал выставка, гьарцагу райондалул майдан, концертрал программа. Балайрду учинтIиссар машгьурсса балайчитурал. ДукIу лак МахIачкъалалив диктант чичлачисса кьини Москавлив­сса лакралгу чирчуссия диктант. Гьашинугу Москавливсса лакгу хIадур хъанай буссар вара кьини диктант чичин.