Ва нюжмар республикалий дайдирхьунни ххуйсса ишираяту: ларгсса итникьини МахIачкъалалив ятинсса ва ургала акъа ливчIсса 105 инсаннахьхьун дуллунни цIусса квартирардал кIулли.
Ва шадлугърай гьуртту хьунни ХIукуматрал хъунаманал хъиривчу Муслим Телякавов, МахIачкъалаллал мэр Салман Дадаев, Шагьрулул депутатътурал мажлисрал хъунама Марис Илиясов ва цаймигу бусравсса хъамал. Салман Дадаевлул бувсунни 2019-ку шинал 42 квартира машан лавсшиву ятинтуран ва ургала акъа ливчIминнан булун, 2020-ку шинал – 40 квартира, гьашину тIурчарив, Дагъусттаннал ва МахIачкъалаллал тарихраву уттинин къавхьусса иш хьушиву, цакуну 105 квартира машан лавсъсса. Бувсунни, закондалул тIалавшиннарайн бувну, 33 квадратный метр дусса квартирарду къалавсшивуча, 45-55 квадратный метр дусса лавсшиву. Цивппа квартирардугу, ххуйсса ремонтращалсса бушивруцIун, газрал плита, сантехникагу дусса бушиву. Ванал барчаллагь увкунни ххуйсса къатригу, оьрчIансса площадкарттугу дуваврихлу.
Муслим Телякавовлул бувсунни Дагъусттаннал БакIчи Сергей Меликовлул ятинсса оьрчIру къатрал дузал баврих хъуннасса къулагъас душиву, 2021-ку шинал республикалул бюджетрава ялунгу ккаккан дуршиву 500 миллион арцул, чIярусса шиннардий лябукку бакъасса ва масъала щаллу буван. Украиннаву спецоперация най бушивруцIун дархIусса захIматшивуртту духьурчагу, хъиривсса шиналгу вава иширан 100 миллион ялунгу ххибувантIишиву. ЦIусса квартирардал заллухъруннал ххаришиву хъун дурна «МахIачкъала» къавтIаврил ансамбльданул ва халкьуннал артистка Зайнаб Махаевал.
