Вай гьантрай Дагъусттаннал Чичултрал союзрал къатраву ирглийсса батIаву хьунни.
Ва дачин дурну ия Дагъусттаннал Чичултрал союзрал лакрал отделениялул председатель Илияс МахIаммадов.
БатIаврий гьуртту хьунни Дагъусттаннал халкьуннал шаэр М. Давыдов, Аьрасатнал Чичултрал союзрал члентал Б. Оьмариева, Аь. Магьдиев, А. Къянчиев, Б. Гъазиева, М. Ттупчиев ва хъамал.
БатIаврий ххал бигьлай бия кьинилул масъалартту. Илияс МахIаммадовлул ихтилат бунни чичултрал союзраву хъанахъисса дахханашивурттая, лакрал шаэртурал ялун нанисса юбилейрдайнсса хIадуршиннарая, кIицI ларгунни жагьилсса шаэртал ялун личин буван дуллалисса давуртту ва конкурсру.
Ихтилатру бувунни ва батIаврил цайми гьурттучитуралгу, гьаз бунни щаллу буван багьлагьисса личIи-личIисса масъалартту.
БатIаврий Дагъусттаннал Чичултрал союзравун кьамул бувунни лакрал жагьилсса шаэртурал сияхIрай цин лавхьхьуну лайкьсса кIану бугьлагьисса Хъусращиял шяравасса Аминат АхIмадова. Утти Союзравусса лакрал шаэртурал кьюкьлуву ца цIа ххи хьуссар.
Аминат буккултран кIулссар «Илчи» кказитрайсса, «ЦIубарз», «ЧIавалачин» журналлайсса назмурдайну, лакрал ттизаманнул балайчитурал щаллу буллалисса балайрдавусса мукъурттийну, утти, тIурча, «Илчи» кказитрай дуклакисса макьаларттайнугу.
Уттинин Аминат АхIмадовал итабавкьуну бур «Мусил кIичI» ва «Инагу, нагу» тIисса луттирду.
Барча тIий буру жула даврил уртакь Аминат АхIмадовахь чичултрал кьюкьлувун кьамул баву. Ина лавсъсса ша барачатсса хьуннав, вил хъирив жулва лакрал жагьилсса цайми-цайми шаэртуралгу, чичултралгу цIарду ххи хьуннав лакрал чичултрал ххуттай, лакку мукъул, лакку мазрал сий ларай хьуннав!
ЧIа тIий буру вин ванияр тийнмайгу гьарца дуллалимуниву тIайлабацIу, цIу-цIусса назмурду чичлансса, цIу-цIусса луттирду итабакьлансса кьудрат!
