Цаппара гьантрал хьхьичI Лакрал театрдануву, махлукьатгу бавтIун, кIицI ларгунни цIанихсса шаэр Мирза МахIанмадовлул 100 шинал юбилей. Шаэрнал аьпалул мажлис Оьруснал театрданул хъунмур залдануву дурссаниягу, мугу, махъ бакъа, буцIинссия. Оьрмулул бугьараминная тIайла хьуну, жагьилсса инсантурал щапI куну бувцIусса зал къаккавккун ттул хъунмасса хIалъя.
Цимил дарчангу, цалнияр цал лавайсса даражалий лагай Мирза МахIанмадовлул юбилейрду. Ва ххуллухсса аьпалул мажлисгу хьунни шаэрнал творчество бюхттулну ва кьиматрай душиврун барашинна дуллалисса.
Зал буцIаврийнугу, Мирза МахIанмадовлул творчество ларайсса душиву, му инсантуран ххирасса ушивруцIун, мунал душваврал хIурмат бушивугу чIалай бия. Шаэр уттавассар дакIний уссаксса, ванал шеърирду жяматрал зумув буссаксса.
Мажлисрал сий хъиннура хъунна дурна, цаннаяр ца гьунар бусса, жула ххаллилсса балайчитурал: Лариса ХIажиевал, Арслан Шагьмардановлул, Аслан Муслимовлул, Карин Кьадинаевлул, Шагьалай МахIаммадовал, Нурианна Къаллаевал, Марианна МахIаммадовал, Диана Кьадинаевал ва цайминналгу.
Оьрму кутIасса бивкIнугу, наслулул чулуха талихI бусса ивкIун ур Мирза. Юбилейрал сакиншинначиталну хьусса, кувннал кув бувгьусса шаэрнал душваврал мажлисрай гьурттушинна дан увкIсса гьарцагу хъамаличунах хъуннасса къулагъас дия. Буттал цIа узданну дуручлачисса наслулул барашинна дуллай бия Мирза цала гьунардануцIун аьзизсса ппугу ивкIшиву.
Шаэрнал душру – Фиалка, Людмила, Эльмира, Жамиля миллатрал дянивгу бусравну бушиву исват хъанай бия.
Барчаллагь вай душваврайн, ва захIматсса чIумал кIу къабивзун, буттал аьпа абад буллай дурсса ххаллилсса даврихлу!
