Аьрасатнал клиникарттал чемпионатрай дипломран лайкь хьунни жула лакку оьрчI

Аьрасатнал клиникарттал чемпионатрай дипломран лайкь хьунни жула лакку оьрчI

Уттигъанну Москавлив хьусса «Профессиональное отбеливание зубов» тIисса щалвагу Аьрасатнал клиникарттал чемпионатрай 2-мур даражалул дипломран лайкь хьунни жула лакку оьрчI, Карашрал шяраватусса Башаев Муршид Русланнул арс.

Ккарччал хIакинтурал дянивсса ва чемпионат хьуну дур «Inwhite Medical» тIисса Москавуллал ца яла бусравсса стоматологиялул клиникалий. Чемпионатрал гьурттучитурал давурттан кьимат бивщуну бур билаятрай цIа ларгсса ккарччал хIакинтурая сакин бувсса жюрилул. Миннавух ур стоматологтурал дунияллий ххуйну цIа-бакI машгьурсса Андрей Акуловичгу.

Ва  Муршидлул цалчинсса ххувшаву дакъар. Ваниннин цаппара шиннардил хьхьичIгу Аьрасатнал хъуншагьрулийсса стоматологтурал дянив хьусса конкурсрайгу жагьилсса хIакин  лайкь хьуну ивкIссар лавайсса кьиматран.

Цала язи бувгьусса пишалул циняв шачIанттайн лахъан­сса каши-кьудратгу чан къахьуннав тIий, чIа тIий буру Муршидлун вания тихунмайгу чIявусса тIайлабацIуртту, цалла пишакаршиву магьир дуллансса гъира-шавкь лагь къашаву!

Читайте также: