Вай гьантрай ЦIуссалакрал райондалийсса ТIюхчардал школалул чIирай ларчIунни Украиннаву хасъсса аьралий операциялуву жан дуллусса, Къучагъшиврул орденналул кавалер хьусса разведчик-снайпер Умалат Мусаевлул аьпалул ула.

Виричунал аьпа абад буллалисса мажлисрай гьуртту хьунни ЦIуссалакрал райондалул бакIчи МахIаммад-ХIажи Айдиев, ДР-лул кIулшивуртту дулаврил министр ЯхIия Бучаев, Умалат Мусаевлул нину-ппу, гъан-маччами ва чIявусса хъамал.

Мажлис тIитIлай, Умалат Мусаевлул эбратну ва виричуну бивтсса оьрмулул ва аьралий ххуллия бувсунни МахIаммад-ХIажи Айдиевлул ва ЯхIия Бучаевлул. Вайннал барчаллагь увкунни къучагъсса арс тарбия увсса нитти-буттахь ва кIицI лавгунни жува буржлувну бушиву дакьаврил цIаний жанну дуллусса къучагътурая хъирив нанисса никирахьгу пахрулий буслан.
Ва мажлисрай ххуйсса программа хIадур дурну дия дуклаки оьрчIал. Умалат Мусаевлул классрал каялувчину бивкIсса учительницал бувккунни виричунан хас бувну цила ляхъан бувсса шеъри.