Вай гьантрай Буршиял жяматрал лахъа-хъун унни, Бразилиянал чемпион Чарльз Оливейрощал ччалли увккун, ххувшаву ларсъсса UFC-рал чемпион Ислам МахIачев. Ванащалсса хьунабакьаву хьунни МахIачкъалалив «Аль Азиза» тIисса банкетрал залдануву.

Жула чемпион Абу-Дабилия зана шайхту, ванащал хьунабакьин ччай, цачIа-цачIана оьвтIий, агьалинал ва игьалаган итлай бакъар. Ва Дагъусттаннайн учIайхтугу, хьунаакьин кIюрххила аэропортрайн бувккун бия хьхьичIунсса вакилтал. Миннавух бия Дагъусттан Республикалул БакIчи Сергей Меликов, Дагъусттаннал виваллил иширттал министр Аьвдурашид МахIаммадов, спортрал министр Сажид Сажидов, жула машгьурсса спортсментал.
Ислам МахIачевлуйн цала жяматращал хьунаакьин оьвкунни Чачан Республикалул БакIчи Рамзан Кьадировлулгу. Чемпион лахъа-хъун уллалисса хъуннасса байран хьуссар Лакрал райондалийгу.

Ва ххуллухрив Ислам хьунаавкьунни буттал шяраваллил – Буршиял жяматращал. Ши-ккун бувкIун бия, Дагъусттаннайми бакъассагу, Москавлив, АьсатIиннаву, Къабардиннаву ялапар хъанахъисса буршиял кулпатру.

Мажлис бачин бувну ия жяматрал дянив цIа бусравсса, жяматийсса, сий ххисса чув Султан ЦIаххаев.
– Ислам, ина ккаккан бувссар зунтталчунал яхI-къирият, кьянкьа-кьурчIишиву, сисаву. Ина эбратну хьунтIиссара цимирагу никирал жагьилтуран. Дунияллул халкьуннал дянив ина бюхттул дурссар, машгьур дурссар Буршиялгу, лакралгу, щалагу Дагъусттанналгу цIа. Хъунмасса барчаллагь мукунсса, щалагу Дагъусттаннал жяматрал пахрулунсса, арс тарбия увсса вил нитти-буттан,– увкунни хьхьичIмукъуву Султан ЦIаххаевлул. Буллунни Исламлухьхьун Буршиял жяматрал чулухасса Барачаллагьрал чагъар.
Хъирив жагьилтурал бахшиш бунни Исламлун кIяласса варси, суркьяпа ва ххаржан. Вайннал личIисса бахшиш дунни чемпион тарбия увсса буттангу.
Мажлис нанисса ссятурдил мутталий Исламлухьхьун щяикIансса мажал бириллай бакъая. Ванащал сурат рищун ччай бия мюрщимигу, хъунимигу. UFC-рал чемпионнал мухIлу, залданувун бавтIцириннал суратру ришлай, канища кани­хьхьун дуллай бия. Сант дирирну дунура, жугу рищарду чемпионнащалсса дакIний личIансса суратру.
Ислам барча уллай, ванахь барчаллагь тIисса ихтилатру буллалисса чIявусса бия.

Ахирданий, щарнил жяматрахь барчаллагь тIутIисса, жагьилминнахь насихIатрайсса ихтилат бунни чемпионнал цалвагу.
– На ххарину ура, ттула ххувшаву сававну, хIакьину шикку щалагу щарнил жямат, цинявппагу ттула гъан-маччами батIаврия. Жува зунттаву, кьянкьасса зунттал шартIирдай хъуни хьусса инсанталлу. КIиччар нанисса жула яхI-къириятгу, сисавугу. Мунияту бухьунссар, тIий икIара, Дагъусттанная чIявусса чемпионтал бувкссагу. ЧIивиний нагу цайминнаяр личIи акъа- сса оьрчI ивкIра. Амма ттун бувчIлай бия, ттула хьхьичI бивхьусса мурадрайн ияншиврул, хъунмасса захIмат бишин аьркиншиву. Ччан бикIарчан, захIматрайнугу, хIарачатрайнугу ччимур лахъазан ласун шайссар, – увкунни Исламлул.

Ванал оьвчаву дунни жагьилтурайн спортрахун багьияра, цукунчIавсса захIматшивурттая нигьамабусару, сивсуну хьхьи­чIунмай бачияра куну.

Андриана Аьбдуллаева
Имара Саидова