Ва нюжмардий Аьрасатнал Президент Владимир Путиннул урчIва шагьрулун «Город трудовой доблести» тIисса ларайсса цIа дуллушиврул хIукмулий къулбас дунни. Ларайсса цIанин лайкь хьунни Каспийск шагьругу «1941-1945-ку шиннардийсса Буттал кIанттул цIанийсса Хъунмасса дяъвилий ххувшаву ласун бутIа бишаврихлу, промышленностьрал предприятиярттай аьралий ва граждан продукция саргъунну итадакьлай бувсса хIарачатрахлу ва агьалинал виричувсса захIматрахлу «Город трудовой доблести» тIисса Аьрасатнал бусравсса цIа дуллалиссару Астрахань, Норильск, Орск, Вологда, Горловка, Златоуст, Каспийск, Луганск ва Якутск шагьрурдан», – тIий чивчуну бур указрай. ДакIнийн бутанну, Каспийск Дагъусттаннал тарихравусса ца яла цIумур шагьру бушиву, 1932-ку шинал байбивхьушиву ва шагьрулул ххуллу, Двигательстрой поселок хIисаврай. 1947-ку шинал Каспийск шагьру хIисаврай щаллу хьуссар. КIицI лаган аьркинни ва шагьру буллайгу, «Дагдизель» завод ччаннай бацIан буллайгу лакрал агьалинал биялсса бутIа бивхьушиву ва хIакьинусса кьинигу чIявусса лак яхъанахъисса шагьру бушиву.