Вай гьантрай Каспийскаллал флотилиялул кIицI лаглагиссар 300 шинал юбилей. ВаницIун дархIусса шадлугъру най дикIантIиссар цаппара гьантрай Каспийскалий ва Ашттарханнай.

Тталат кьини Ашттарханнай Аьрасатнал аьралуннал ва хьхьирил флотрал Римский-Корсаковлул цIанийсса оркестрданул ккаккан дунни концерт. Вара оркестрданул концерт хьунни ноябрь зурул 16-нний МахIачкъалалив, 17-нний Каспийскалий, «Москва» тIисса концертрал ва дялахърулул залдануву.
Ххуллункьини, ноябрь зурул 19-нний, Каспийскаллал кадетътурал хьхьирил школа-интернатрал дуклаки оьрчIру шадлугърал даражалий кьамул бантIиссар Юнармиялул юнганал кьюкьравун. Вара кьини Приморская кучалий школа-интернатрал кадетътуран концерт ккаккан дантIиссар «Черные береты» ансамбльданул.
Агьамми мероприятияртту дикIан тIий дур ноябрь зурул 20-нний. КIюрххил, ссят 9 хьусса чIумал, хьунтIиссар флотилиялуву къуллугъ буллалиминнал шадлугърал даражалийсса построение. «Черные береты» ансамбльданул ккаккан дантIиссар концерт «Москва» комплексраву флотилиялул аьралитуран, миннал кулпатирттан ва хъамаллуран.
Вара кьини дяъвилул иширттаву жанну дуллусса моряктуран- каспийцынан гьайкал дацIан дантIисса кIанттурдай бишинтIиссар чару.
ДакIнийн бутан, Волгалул ва Каспийскаллал направлениялийсса жамирдал соединениярттал гьану бивзссар 1722-ку шинал ноябрь зурул 15-нний Петр Цалчинманал хIукмулийну.
2018-ку шинал Аьрасатнал обороналул министр Сергей Шойгул хIукму бувссар Каспийскаллал флотилия Ашттарханная Дагъусттаннайн бизан бан. ЦIанасса чIумал флотилия Аьрасатнал аьралуннал ва хьхьирил флотрал ударный соединениялун ккаллиссар. Ванил агьаммур мурадгу хъанахъиссар региондалий Аьрасатнал паччахIлугърал мурадру буруччаву, терроризмалийн къарши бацIаву.