Ноябрьданул 15-нний Дагъусттаннал БакIчи Сергей Меликовлул дунни Оператив штабрал ва Республикалул призыврал комиссиялул цачIусса батIаву.
Ххал бигьлай бия мобилизациялий бувцуминнал ва мукунма хушрай хасъсса дяъвилул операциялий гьуртту хъанахъиминнал кулпатирттан ккаккан бувсса социал кабакьулунсса чаранну.
Масъалалул хIакъираву махъ лавхъунни региондалул захIматрал ва социал лябуккулул министр АьбдурахIман МахIмудовлул.Ванал тIимунийну, республикалий ккаккан дурну дур цал булайсса арцуйнусса напакьа (выплата) 100 азарда къуруш. Ми арцу дулун бюхъаншиврул региондалул хIукуматрал луртандалул фондравату личIи дурну дур 350 млн къурушру. ЦIанасса ппурттуву ми арцу дуллуну дур заявленияртту чивчусса 2251 инсаннан. Ми дакъассагу, бюджетрал арцух хушрай лавгминнал ва мобилизациялий бувцуминнал оьрчIан дуклансса кIанттурду ккаккан бувну бур Дагъусттаннал халкьуннал хозяйствалул университетраву. Миннан хIадур буллай бур цаймигу чаранну, масалдаран, налогирттал чулухасса хIаллихшинну, давурттал дузал бансса кIанттурду хIадур баву ва цаймигу.
Республикалул каялувчинал хъинчулийсса кьимат бивщунни идаралул дурсса давурттан. Мунал мукунма кIицI бунни гьарца мукунсса кулпат дузал бувну бикIан багьлай бушиву аьркинмунил.
Сергей Меликовлул тIимунийну, хIакьинусса кьини Дгъусттаннай ца шинайсса аьралуннавун буцаврил (призыв на срочную службу) даву пландалийну най дур. Мунал мукунма мяйжан бунни ссутнил призыврал цукунчIавсса дахIаву дакъашиву утти къуртал хьусса чан-кьансса мобилизациялущал. Дагъусттаннал БакIчинал бувсунни ца шинай аьралуннаву къуллугъ буллан буцайсса саллатI тIайла къабуккайшиву Донецкаллал ва Луганскаллал халкьуннал республикарттайн, Запорожскаллал ва Херсонскаллал улкрайн. Ми гьуртту къабуллантIишиву Украиннай нанисса дяъвилул операциялий.
