Ва зурул 20-нний жула хIурмат бусса, щала Дагъусттаннал агьалинангу кIулсса, бусравсса лаккучу, чIяйричу Шалласу Шалласуев ниттил увну там хъанай дур 75 шин. Учин бигьанугу, вай чансса шинну дакъар. Амма Шалласул дахьра чагъирайсса шинну дур учивияв на.
Ванал бувтсса оьрмулиягу, ванал дурсса чIярусса уздансса давурттаягу тамансса чигу-чивчунни. Амма ванаяту кумургу, чивчумургу тачIаввагу ххишалану къачIаланссар. Ва лайкьгу хьунни ларайсса цIардан ва наградарттан, миннуяту кIу-къакIулсса, бакъавсса бакъахьунссар тIий ура. Кулпатраву оьрчI-душ бувкун, зукьлурду буллан бикIай, тирххандарансса, нитти-буттал дянив хъуна хьунсса, салихIсса изаннав-бизаннав тIий.
Гьай-гьай, Шалласу увнийгу, нитти-буттахь вайва махъру ва зукьлурду тикрал буллай бухьунссия. Ми зукьлурду багу-бавцIунни Шалласуха, ванал бувтсса ва бутлатисса оьрмулуха. Амма Шалласул ппу Рамазан ччяни ялату лавгун, ниттил хъунмасса захIмат бивхьуну хъунагу, тарбиягу увссар Шалласу.
ЧIивинийва ва ия хъинну бусравсса, цала чIунархIал оьрчIаву сий дусса, дарсирдал хIарачат бусса, оьккимур-ххуймур кIул бан ччисса, хIалимсса оьрчI. Нава ванаяр чIивисса унугу, ттун ва мудан итталу икIайва, ванаяту эбрат ласлай, ванай мяш хъанан икIайссияв.
Оьрму наниссаксса, гьантлия гьантлийн, шиная шинайн, ахирданийгу хьуна ххаллилсса чув – кулпатран, жяматран, цинявппагу лакран бусравсса, аькьлулул увччусса инсан. Чансса бакъассар ванал кумаграйну ларайсса ва дянивсса кIулшивуртту ларсъсса оьрчIру ва душру. Гьарца буллалисса маша-ташулийгу, мажлисирттайгу Шалласу тямадари.
Бакъассар бивкIу-букку Шалласу хIала акъасса, цува учIан къахъанай ухьурча, я телеграмма къадуллусса, ягу телефондалувух кьурчIишиву кIикъадарчIусса. Тамансса инсантуран Шалласул хIарачатрайну хьун дурссар хIукуматрал чулухатусса цIарду ва бахшишру. Хъинну хъуннасса гьурттушинна дайссар Шалласул шяраваллил ва шагьрулул жяматрал давурттавухгу. Ванал сиптардайну хьуссар МахIачкъалалив ва Каспийскалий Совет Союзрал Виричу ЦIаххуй Маккаевлул цIа дирзсса кучарду,ЧIяйннал школалун 90 шин шаврил юбилейрай ПаччахIлугърал чулухасса ХIурматрал грамота дулаву, уттинин республикалул цавагу школалул дакъасса. Вава школалул 100 шин шаврил юбилей хъанахъисса чIумал, Президентнал фондраяту шанма миллион арцул итабакьин бувссар школа ремонт бан, юбилей хьуннин. Мукунма, вара юбилейрацIун бавхIуну, Шалласул хIарачатрайну бувкссар дунияллийн «Помним, любим, гордимся» тIисса ххаллилсса лу. Ххишалдаран, му луттирал автортурангу дуллуссар ПаччахIлугърал премиялул лауреатътурал цIарду.
Шалласул тIалавшиндарайн бувну хъунмасса кумаг хьуссар муниципал къуллугъчитурал ласайсса пенсияртту ххи баврин. ЧIярусса дуссар Шалласул дурсса ххуй-ххуйсса давуртту, ми цинярда кIицI лагангу къахьунссар.
Бакъар Шалласун къакIулсса я шяраву, я шагьрулий агьамсса ишру. Бакъар, чансса бакъа, агьали Шалласу къакIулсса. Ванал уттининсса оьрму лавгунни хъинну яргну, бусравну. Ва хIурматрай ур ччарча цува зузисса кIанттурдай, ччарчагу агьалинаву.
Ттула цIаниятугу, кулпатрал ва мачча-гъанминнал цIаниятугу барча дуллай хъуннасса юбилей, чIа тIий ура дуснан Шалласун вания тихуннайгу цIакьсса цIуллушиву, оьрмулуву талихI ва тирхханну! Ттухьва цIуххирчан, вил оьрму дахьва бачIиннийн бивну бур.
Нагу вил дус, шяравучу
МахIаммад Оьмаров
