Журналистикалуву ванил бувгьуну буссар лайкьсса кIану

Журналистикалуву ванил бувгьуну буссар лайкьсса кIану

ДР-лул Халкьуннал мажлисрал председательнал хъиривчу Камил Давдиевлущал

Ххаллилсса журналист, «Илчи» кказитрал отделданул редактор, Дагъусттан Республикалул лайкь хьусса культуралул зузала, жула лакку кказитрал ца яла чялишмур зузала Андриана Аьбдуллаевал вай гьантрай кIицI ларгунни оьрмулул 60 шинал юбилей. Вай шиннардива дачIиннуяр ххишала­ссагума ванил харж дурссар цила язи бувгьусса журналистнал пишалун.

Лавайсса кьиматирттай Ккурккуллал дянивмур даражалул школагу къуртал бувну, ва бувххун бур Дагъусттаннал университетрал филологиялул факультетрайн. Университет къуртал байхту, Ххюлуссуннал школалийн тIайла буклакисса ппурттуву, му хавар бав­сса ванил цила учитель ва класс­рал каялувчи, тай шиннардий Ккурккуллал школалул директорну ивкIсса Даниял Магьдиевлул (аьпа баннав цал), на ттула ученица Ххюлусмав гьан къабитайссар, Ккурккуллал школалий филологтал аьркинну бур куну, цачIава зун бувцуну бур. Цила давугу ххуйну кIулсса, зунгу гьавас бусса жагьилсса учительница ччяни ххира хьуну бур дуклаки оьрчIангу, учительтурал коллективрангу. Учительнал пишалухсса ччаву тIурча, ванийн дирну дур чIярусса шиннардий личIи-личIисса школарттай учительталну зий бивкIсса нитти-буттая.Андрианал ппу Пятали МахIаммадовичлул дишайсса диркIун дур физкультуралул дарсру. Нину Шагьриман ХIажиевнал – оьрус мазрал ва литературалулми. ЧIивисса бивкIнугу, Андрианан дакIний лирчIун дур бигьалагай кьинирдай, ахьтта нанисса буттал карав бувцуну, Тебек-Мащилия Ккурклив бучIайсса чIунну. Ци кIулли, танийва ххира хьухьун­ссия ванин учительнал пишагу.

– Буттал 70 шинал оьрмулувугу ца куклуну турникрай упражненияртту ккаккан байва оьрчIан, ттуву му чулухунмайсса бюхъу бакъая. Ттун ниттия оьрус мазрахсса ва литературалухсса гъира-гьавас бивну бия. На университетравун бухлахисса чIумал, яла сий думур ва буххан захIматмур факультет бия совет машлул факультет, деканнугу ия ттул шяравучу, гъанчу КьурахIажи Магьдиев. Укунсса сант дунура, филологиялул факультетрайн документру буллусса ттуй махIаттал хъанай бия ттущал экзаменну дуллалими. Ттунмарив хъунисса классиктал лахьлан тIисса, оьрус мазрал куртIнивун бухлантIисса филологиялул факультет яла бюхттулмурну ва сий думурну чIалай бия. ТачIав пашмангу къавхьуссара. Оьрус маз ва литература ттун хъиннура ххира хьун дуруна ттухьра дарсру дирхьусса, лавайсса даражалул пишакартурал: Георгий Сивридил, Ума Садыкьовнал, Фируза Аьбиловал, Лира МехIаевал, Рашель Лихтманнул, Наталья Евсеевал, Самсон Бройтманнул, Наида Муртузалиевнал ва мукунма цайминнал, – тIий бур Андриана.

Ниттищал. 2022 ш.

Ххюра-ряхра шин Ккур­ккуллал школалийгу дурну, 1991- ку шинал, «Илчи» кказит буклан бикIайхту, Андриана редакциялийн зун бувкIун бур. Корректорная байбивхьуну, отделданул редакторнайн бияннин зий 31 шин хьуну дур, миннува 20 – отделданул редакторну.

«Илчилул» коллективращал

1996-ку шинал ва кьамул бувну бур Аьрасатнал Журналистътурал союзравун.
Кказитрай зий бунува, Анд­рианал къуртал бувну бур Да­гъусттаннал университетрал журналистикалул отделениягу. Буслай бур танийсса цила преподавательтал Рашид Акавов, Азнаур Аджиев яла информациялул ва печатьрал министрталну бивкIшиву. Та чIумалсса дипломрал давугу ванил «Илчи» кказитрацIун дархIуну чирчуну дур. Хъягу-хъяй, дакIнийн дутлай бур дипломрал защита дуллай бивкIсса куц.

Буттащал. 1963 ш.

– На защита дан бувксса чIумал, комиссиялувусса, танийссагу, уттиссагу ттула преподаватель, Наида Муртузалиевнал (цIана ва «Зунттал хъами» журналданул хъунмур редактор хъанахъиссар) бувсунни комиссиялувуминнахь на хьхьичIвагу цачIава дуклай бивкIшиву, цIана на лакку кказитрай зий бушиву. Проректор (цIа къадакIнийри) ттухь миллатирттал кказитирттая, даврил шартIирдая цIухху-бусу буллан ивкIуна. Та ппур­ттуву жул харжру лапва мюрщисса бия. Му бавну махIаттал хьусса проректорнал хъярчирай цIувххунни: «Яр мукунсса харжирацIух ина тикку ссал бувгьуну бура»? – куну. «Патриотические чувства», – куну, жаваб дуллуссия нагу. – Повезло лакцам, что у них такие патриоты есть, – увкуна ганал хъянгу ивкIун, – дакIнийн бутлай бур Андриана.

Мунияту бухьунссия тай шиннардий кказитрал хъунмур редактор Качар Абачараевнан «Илчи» кказитрал цалчин­сса редактор Гьарун Саэдовлул цIанийсса премия Андрианан дулун пикри хьусса.
Кказитрай зузиссаксса шиннардий, хIакьинусса кьинигу, ванил аьч дуллай буссар Да­гъусттаннал личIи-личIисса гужирдал структурардал – Виваллил иширттал, Юстициялул министерстварттал, Аьралий комиссариатрал ва МЧС-рал, Росгвардиялул ва УФСИН-далул давуртту. Вай цинярдагу ведомстварттал чулухасса наградарттугу лайкь дурссар ванил. Пандемиялул чIумал, коронавирусрал инфекция ппив хьун къаритаву мурадрай, дурсса даврихлу ва лайкь хьуссар Дагъусттаннал БакIчи Сергей Меликовлул чулухасса Барчаллагьрал чагъарданун .

Андрианал гьарица шинах хьхьичIунсса кIанттурду бугьайссар СМИ- дал дянив баян бувсса личIи-личIисса конкурсирттай. Цума-цагу жул зузалал хьхьичIуннайшивурттал ва ххувшавурттал тасттикь буллали­ссар республикалул СМИ-лул дянив «Илчи» кказитрал лайкьсса кIану бувгьуну бушиву.
2017-ку шинал, журналистикалул ххуллий дурсса давуртту хIисавравун ларсун, Андрианан дуллуссар «Дагъусттаннал культуралул лайкь хьусса зузала» тIисса бусравсса цIа.
Андрианая буслай, ттун чара бакъа кIицI лаган ччива ва цила даву дагьайкун кIанийн дуртун дайсса, хъунна­сса жаваблувшинна дусса зузала бушивугу, цила материаллал ялув личIлулну ба­цIайшивугу.

Андриана буслай бур цала кулпатраву кIулшивурттал сий хъуннасса дия тIий.
– Цайми нинухъру душру щар булун хIарачат буллалисса чIумал, ттулмур дикIайва щар шавриясса пикрирду мабару, цал институтру буккияра, касму лахьхьияра тIий, – буслай бур Андриана.
Андрианал хIарачат бувну бур цилами оьрчIругу кIулшивурттал ххуллийн буцин. Хъунама арснал къуртал бувну бур Дагъусттаннал медициналул университет. ЦIана ва Москавлив ординатуралуву дуклай ур. Студентну усса чIумала, ятIул зонардай зий, лайкь бувну бур Дагъусттаннал БакIчи В.Васильевлул чулухасса Барчаллагьрал чагъар. Цаппара зурдардил хьхьичI мукунмасса чагъар ванан буллунни Москавуллал мэр Сергей Собяниннул чулухагу. ЧIивима арснал гьашину къуртал бунни Дагъусттаннал университетрал психологиялул ва философиялул факультет.

ЧIа тIий буру Андрианан цIуллусса лахъисса оьрму. Уттиния тихунмайгу кказитрал даву хьхьичIуннай дуллансса каши-кьудрат дулуннав вихьхьун, жул редакциялун кIини кунмасса Андрианай!

Андрианал юбилей барча дуллай, укунсса ххару чивчуну бур Москавлия ванил дус Ххадижат ЦIаххаевал:

***
ТIутIан щавщусса арив
Ххярхсса дараччи тIутIий,
Эмаратсса кьункьаву
Миллат машгьур буллайсса.

Чанна лархъсса ссав кунна,
Чанна лархъсса дакIнищал,
Гьунарданул хъаттирдай
Миллат машгьур буллайсса.

ХIакьсса лакрал миллатрал
ХIакьсса ххаллил лаккудуш
ХIарачатрал халича
Миллатрах ччаврий щавшсса.

Оьрмулул манзилданий
ТIутIайх бичлай битаннав,
ХIарачатрал халича
Миллатран бусрав хьуннав!

Дараччи тIутIул кьункьай
Лакрал миллат битаннав,
Андрианал дакIниву
Ххувзаннал нур лахъаннав.

Имара Саидова

Журналист, обозреватель. Освещает культурные собыия в Лакском и Новолакском районах.

Читайте также: