Парламентрал хъунаманалгу чемпион лахъа-хъун унни

Парламентрал хъунаманалгу чемпион лахъа-хъун унни

Ноябрь зурул 7-нний Дагъусттаннал Халкьуннал мажлисрал председатель Заур Аскандаров хьунаавкьунни UFC-лул турнирданий чемпионнал мухIлу ларсъсса Ислам МахIачевлущал. Хьунабакьаврий гьуртту хьунни парламентрал вице-спикер Камил Давдиев, цаймигу депутатътал, Кировский райондалул администрациялул бакIчи СалихI Сагидов, чемпионнал хъунама уссу Исмяил.

Заур Аскандаровлул, цIусса чемпион барчагу увну, увкунни:
– Ттун ттунагу кIулссия Аьбдулманап НурмахIаммадов. Ина вила ххувшавугу мунан хас дуваву хIисавравун ласунсса иш бур. ХIабиблул ва вил ххувшавриву тренернал бутIа хъунмассар. Щалва Дагъусттан, ина данди уккайни, хъирив бавцIуну, тамашалий бивкIссар. Вил ххувшаврил жагьилтуравунгу гъира бутлатиссар, спортрал хIакьсса арамтал тарбия буллалиссар, ина эбратну хъанахъиссара уттисса никиран. На вин маслихIат бавияв ччя-ччяни оьрчIащал хьунаакьаван.
Парламентрал спикернал кIицI лавгуна Сочилий «Къа­ла» тIисса клубрал академия­лул зал тIивтIуну бивкI­шиву Аьбдулманаплущал ва ХI­библущалгу маслихIат ккавккун, укунмасса клуб чIал къав­хьуну МахIачкъалаливгу тIи­тIиншиву.

Исламлул бувсуна цала ххувшавричIансса ххуллия, спортраву ххув хьунгу, оьрмулуву дакI хъун дакъасса инсанну личIангу лахьхьин буллалисса тренер Аьбдулманаплуя.
Депутатътуралгу цала ихтилатирттаву кIицI лавгуна Исламлул ххувшаву цIанакулсса ппурттуву агьалинан хаснура агьамсса душиву. Ахирданий парламентрал хъунаманал физкультура ва спорт гьаз дувансса хIарачатрахлу ва спортравусса хьхьичIуннайшивурттахлу Да­гъусттаннал Халкьуннал мажлисрал цIаниятусса ХIурматрал грамотагу, Председательнал цIаниятусса каний дахIай ссятгу дуллуна Ислам МахIачевлун.

Патимат Рамазанова

Заслуженный работник культуры РД

Читайте также: