Гьарца кьини къачансса чIун лагай жулла ххуллийх, кIюрххил –даврийн, ахттакьунмай – махъунмай шаппайн, жулва ишир­ттай чун-бунугу най. Ххуллийхсса чIумал жущава шай лагма-ялттусса тIабиаьтрай тамаша буллан, шагьрулул кIичIирттавусса инсантурал зана-кьулушиндарал хIисав ласлан. Укунсса чIумал хIасул хьусса асарду бучIину чIалан бикIай кув чIумал чагъарданийн ласунгу.

Аьрххи-ххуллурдайхсса асарду

* * *
Семендердая дяшагьрулувун нанисса 61-мур маршрутрал микроавтобус. Ванил нузан цирив хьуну бия, ттуккун ттуршал бакъа кьадру къабикIайсса кунма, «кьутI къалавна» къатIитIлай дия. Гьарца бацIан бувний пассажир ухханнин (укканнин) щупирнан багьайва, цува щяивкIния ивзун, нузайн цаща шайкун ччан щун. Лув-ялув ца­ппаралилва щупирнал мукун ччан щайхту, маршруткалувумигу, щупир цувагу хъян бивкIуна. Салондалува ца хъамитайпалул:
– ХьхьичIва, совет заманнай, мукунсса холодильникругу бикIайссия, ччан къавщуссаксса нуз къалакьайсса…
Цамур хъамитайпа:
– Агьа.. Телевизордугу би­кIайссия, кьутI къаувкуссаксса зун къабикIайсса…

* * *
Ттун кунма, цайминнангу къабувчIайривав, дурусну цания-ца ликказандарачIан (остановка) бивсса чIумал, водительнахь «БацIан бува!» тIисса инсантал? Я бияннин, я бивну чIарах бувккун махъ бакъача, га бивсса лахIзалий. Хасну ва ликказан аьркинну духьурча, микроавтобус – ва оьрчIру тIуркIу тIун бикIай машинка бакъархха, цакуну бацIан буван, циванни ганиннин къаувкусса бацIан бува куну? Хъиривмур ликказан аьркинну духьурчагу, щупиргу ташвиш уккан къауллай, ляличIину хьхьичIмур остановкалучIан бияйхту цанни бацIан бува тIун, цахъи тинмай шайхту учин къабавцIуну? Ва ликказандарай бацIан бува тIунгу чIаллихха, хъиривмунийннингу ччярихха, аьркинмур остановкарагу цумурди ва инсаннан тIисса суалгу укунсса чIумал хIасул хъанахъисса хъанайнма бикIай.

* * *
Ялагу къабувчIай жулва цаппарасса инсантал: автобусраву ягу маршруткалуву жагьилми цалва лувату бивзукун, вайннал дакI дуван, яла-ялагу оьрмулул хъунаманал хIурмат буван­сса гъира личIан, «барчаллагь, ттул арс, ттул душ» ягу укунма­сса барчаллагь куну, бусраврай щябикIан кIанай, зунххинугу бурувгун, махъунмай цичIавгу къаувкуна, бавцIусса бавцIунмасса. Я угьарама щякъаивкIун, я лувату ивзсса жагьилма махъунай щяикIан намусну, цаппарасса хIал хьунтIиссар щябикIай кIану бачIва най.
Нажагь, азарунниву цал, чIивима лувату къаизарчангурхха гъургъу буккинмагу чан къахьунтIисса.
Бадрижамал Аьлиева