Ccуттил уссацIунсса маслихIатру

Атил хьусса чятсса уссаву занан ччисса инсан ушиву къакIулли. Укунсса заназиндарая, ва цурда тIааьн да­къасса душаврицIун, цIуллу-сагъшиврунгу нигьачIаву дур, хаснува кьатIув гьава бявкъусса ссуттилсса гъаралуннил чIумал. Уссавун щин духхан къа­ритан­сса, ччанну бякъин къабитан­сса кьяйдардугу къачансса дур. ДакIнийн дичинну цаппара.

Халкьунналми маслихIатру

* * *
ДюрчIуми (бурчул ягу ванил кIанаймунил) уссавун щин къадуххан, вайннуйх дуккира къазрал аьгъушиву.

* * *
Кремран ягу хъандалун кIанай уссайх дуккан бучIиссар касторданул аьгъушиву ягу вазелин.
БучIиссар касторданущал шарда дусса ччимур гъаттарал ягу лелуххул аьгъушиву цара-ца лагрулий хIала дурну дуккангу(щинал парданий гъилигу дурну).

* * *
Усру батарейкалий ягу батарейкалучIа кьакьан дуллан къабучIиссар, бурчу, хъяхъа куну, ччяни зия шайссар. Атил хьусса уссавун кказит бавкьуну, аьркинну бухьурча, чIун-чIумуй бахханагу буллай, цайнура цирда кьакьан дитира.

* * *
Бурчул усру, бюхъавай, гьарца кьини гайра-гай малахларди, бурчущагу «бигьалаган», «ссихI бюкьан» бюхъаншиврул.

* * *
Ссуттил усру машан ласласийни, хьхьичIххуттай вайннул ххуйшиву, къищущиву дикIан къааьркинссарча, хъатрулия­сса ва дякъиясса мюхчаншиву, занан бигьашиву дикIан аьркин­ссар. Ххуйшиву ва мода гьава гъилиний дуллан диртун хъин­ссар. Ссуттилсса ва кIинттулсса усру бикIайкунсса (натуральнайсса) бурчулсса ларсун хъин­ссар. Бурчул уссал гъилишивугу дугьай­ссар, хъатругу духхан къаритай­ссар, ччаннугу, «бугъ къабуллай», «ссихI ласлан» битайссар. Бурчул уссаха къуллугъ буллангу бигьа­ссар цайминнуханияр.

* * *
Замшалул ва нубукрал усру бюхъавай гьава кьавкьний лар­ххун хъинссар. Хъатрулул ва щинал вайннул диц-куц зия дувайссар.

* * *
Уссал чIаннал лахъшиву дикIан аьркинссар 1-2 см. сантиметралуяр кIюла дакъасса, гъарал щин къадилланшиврул. ЧIан цурдагу дикIан аьркинссар цIакьсса ва бигьану лахIлахIисса. Никъа бусса ус ласлай бухьурча, ласира никъа уттамур, никъурал лахъшивугу 4 см. ххишала дакъасса.

* * *
Ххирасса, ххуйсса уссалгума бюхъайссар щин итадакьлан, агарда миннуха къуллугъ къабулларчан. Усру хъунмасса хIаллай дияншиврул ва диц-куц зия къахьуншиврул, карчI къадурну, гьарца кьини къуллугъ буллан аьркинссар миннуха.