Октябрь зурул 28-нний Москавлив Миллатирттал къатлуву хьунни аьлимчу-физик, Лениннул премиялул лауреат Амир Амаевлун 100 шин шаврин хас бувсса аьпалул мажлис.
Ванил сиптачигу, хIадур бувмигу бия Москавливсса Дагъусттаннал Культуралул центр. Найбунува бусан аьркинни Амир Амаев ва центрданул гьану бивзминнавухгу ивкIшиву ва 25 шинай Ветерантуралул ассоциациялий ванал каялувшиву дуршиву. Мажлисрайн бавтIцириннан ккаккан дурна хъунасса аьлимчунал оьрмулиясса видеосурат.
Дагъусттаннал Культуралул центрданул президент Арсен ХIусайновлул, балжину аьлимчунал оьрмулул ххуллия буслай, кIицI лавгунни Амир Амаев атомрал энергетикалул Дунияллул халкьуннал дянивсса агентствалул (МАГАТЭ) экспертну ивкIшиву, билаятрай атомрал энергетика гьаз давриву ванал хъунмасса бутIа бушиву, сайки азарунниха ливчусса элмийсса захIматирттал автор ушиву. Бувсунни, мяйцIалку шиннардий СССР-нул ва США-нал атомрал элмулуха уртакьну зунтIисса комиссия хIасул бувайхту, ва Совет билаятрал чулуха комиссиялул группалул хъунаману Амир Амаев ивкIшиву.
США-нал ядерданул элму ахттар дуллалисса комиссиялул чулухасса ХIурматрангу лайкь хьушиву. КIицI лавгунни дагъусттанлувтураву Лениннул премиялун лайкь хьусса цалчинминнавухгу ва ушиву, Аьрасатнал цIанихсса академиктал И. В. Курчатовлущал ва А. П. Александровлущал Совет Союзрал ПаччахIлугъ дуруччинсса ядерный щит дуллай ивкIшиву, агьамсса гьурттушинна дуршиву Совет Союзрал щинал лултту дачайсса атомрайсса лодкарду давриву ва оьрмулул 90 шин хьуннин зий ивкIшиву Курчатовлул цIанийсса атомный энергиялул институтрал элмийсса каялувчину.
Ихтилатру буллалиминнал кIицI лавгунни Амир Амаев чIявусса кьатIаллил билаятирттайсса конференциярттай, симпозиумирттай гьуртту хьусса аьлимчу ивкIшивугу, пахру-ххара бакъасса, хьхьичIун урувгсса, адаврай къуццу тIисса зунтталчу ивкIшивугу.
Аьлимчу дакIнийн утлатисса ихтилатирттах лях-карах сахIналийн бувккунни Москавуллал ва Дагъусттаннал культуралул цIурттигу. Аьлимчунал арснал, Валерий Амаевлул, барчаллагь увкунни буттал цIанил хIурмат бюхттулсса бушиву чIалачIи бувцириннахь. Мероприятиялий гьуртту хьунни Аьрасатнал Президентнал Дагъусттаннал поспреднал цалчинма хъиривчу Табир Маликов, «Курчатовский институт» НИЦ-лул отделданул хъунмур Алеся Беклямишева, Дагъусттаннал Культуралул центрданул вице-президент, цалчинмур ранграл капитан, профессор ХIусман-ХIажи Аьлиев, Аьрасатнал Элмурдал академиялул член-корреспондент, медициналул элмурдал доктор, профессор Сяъдуллагь Абакаров, «Мосгаз» АО-лул гендиректор, аьлимчунал шяравучу ХIасан ХIасанхIажиев ва цаймигу бусравсса инсантал.
