Лахьхьу бувксса «Илчи» кказитрай буккав UFC-лул цIусса чемпион хьусса жула Ислам МахIачев Лакрал райондалий лайкьну хьунаавкьушиву бусласисса макьала.

Пахру багьунни дакIнивун! КIайксса ил-аьлам бавтIсса шадлугъ Лакку билаятрай хьусса ххай бакъара Совет Союзрал Виричу, космонавт Муса Маннаров кIийн увкIния шинмай.
Видеороликирттай чIалай бия Лакрал райондалул хъуниминнал ва жяматрал ва шадлугърал сакиншинна, хъунмасса харж-хуржгу буккан бувну, чIун ва гужругу харж бувну, цайми миллатру дакI мяш хьунну бюхттулсса даражалий дурну душиву! ДахIалай бакъаривла, туну, миллат бюхттул бансса виртталгу, вирттал лахъа-хъун бансса агьлугу жула бушиву!
Квадрокоптерданул ларъсса видеорттай хъатлий дирхьуну чIалай дия Лакку улклул эмаратшиву.

Ттун дакIнихтуну барчаллагь учин ччай бур хьхьичIва-хьхьич Ислам МахIачевлухь, цала чIивисса миллатрай хъуннасса кьини дацIан дурсса: Лакку билаятрай аргъ дизан дурсса, чемпион лайкьну хьунаакьин хъуннасса шадлугь сакин дурсса Лакрал райондалул каялувчитурахь, вайннал чIарав бавцIуминнахь; лакрал миллатрал гьавас ккаккан буллалисса, жула цIанихсса ватанлувтурая бусласисса «Илчи» кказитрал зузалтрахь. Зу циняв аьмну лавсун, жула миллатраву ватандалухсса ччаву чантI учинсса даву дуллалиссару!

ХIурматращал Зулпат Валиева, ш. Хъусращи.