ЯтIул ттугълил Каспийрал флотилия хIасул бувну 300 шин хъанахъисса кьини ва даталун цIа кусса почталул конверт итабакьаврин хасъсса мероприятие дунни МахIачкъалалив.
Ваний гьуртту хьунни флотилиялул вакилтал, капитан МахIаммадрасул ХIайбуллаев ва подполковник Эрзиман АьбдурахIимов.
Федерал почталул связьрал Дагъусттанналмур управлениялул хъунама МахIач МахIаммадовлул кIицI лавгунни ва конверт дунияллийн буккан бувавугу флотилиялул юбилейрал шадлугъ хIисаврайсса ца чIири-хъунсса даву хъанай душиву, конвертру Аьрасатнал циняв регионнайн тIайла буккантIишиву. Флотилиялул вакилтурал барчаллагь кунни Аьрасатнал почталухь юбилейран хас бувну конвертру итабакьаврихлу. Вайннал конвертирттал экземплярдай цалла къулбасругу дунни. Конвертирттал тираж бур 100 азарва. Итабавкьусса кьинилия тийнмай вай коллекционертуран кьиматрайсса конвертирттан ккаллиссар, МахIачкъалаллал почталул централ отделениялий машан ласунгу хьунтIиссар юбилейрал кьинива.
