Ccуттил уссацIунсса маслихIатру

Атил хьусса, чятсса уссаву занан ххирасса, ччисса инсан ушиву къакIулли. Укунсса заназиндарая, ва цурда тIааьн да­къасса душаврицIун, цIуллу-сагъшиврунгу хъуннасса нигьачIаву дур, хаснува кьатIув гьава бявкъусса ссуттилсса гъаралуннил чIумал. Усса­вун щин духхан къаритансса кьяйдардугу, сурсатругу къачан­сса дур. Бачира вай архIал дакIнийн дутаннуча.

Хъан

Уссал ягу хозяйствалул ттучаннай бахлай бикIайссар щин махъуннай дуван ишла буван­сса хIадурнасса хъан (воск) ва спрей.
Уссансса хъан бикIайссар лухIисса ва ранг дакъасса. Хъан буккайссар дюрчIусса (бурчуя ва ванил кIанаймуния дурсса) уссайх. Ва буккайссар кьаркьсса ва марцIсса уссайх. КIюласса къат дурккун, мугъаятну ссуку буван аьркинссар уссал ялтту. Хъан бувккун махъ уссал диц-куцгу диркIссаннуяр ххуй хьунтIиссар.

Спрей

Уссавун щин духхан къаритайсса спрей ччимур материалданущал ишла дуван бучIиссар: бурчу, бурчул кIанай ишла дуваймур (кожзаменитель), нубук, замша. Укуннугу, ва ишла дурну хъинссар замшалулми ва нубукралми усру хъатрулуя дуруччин. Спрей пурх дуван нанисса усру дикIан аьркинссар марцIсса ва кьаркьсса. Спрей уссайн пурх увкуну махъ вай ларххун, гъаралуннивун букканнин 6 ссят гьан аьркинссар. Спрей пурх дуллан аьркинссар усру хьюмушиврул дуччиннин, яни пурх увкумур уссал дюкьлакьи­ссаксса. Хъиннува хъинссар чакмардайн ца хьхьу-кьинилул дянив спрей цаппаралийлла пурх дуварча. Гъарал лачIлачIисса гьантрай спрей уссайн цимиллагу дутIлан аьркинссар, цанчирча чIумувун ванил гуж, ваниясса асар хьхьара хъанахъиссар.

Ххярацулттавух щин духлай духьурча

Усру цирда цIусса дунугу, хъалану дурурххусса ягу къалайкьсса даражалул усру дуну, ххалаххи бувкIсса ккутIавух щин духлайгу дикIай. Укунсса чIумал дурурххусса щуттайх (шов) хъиннура дуккай­ссар щин махъуннай дувайсса зат (хъан, спрей ягу цамур).

ЧIан хъя куну
духьурча

Уссал чIанулу чIалай-къа­чIалачIисса мюршсса хъякрурду дикIан бюхъайссар, хъатру итадакьлакьисса. Хъякусса кIанава чIан цал наждачкалух ссуку дурну, яла мичча олифа дурккун, кьакьаннин дитира.

Уссайн кьяркьи къадагьанмур бувара

Уссайн, бюхъавай, кьяркьи къащунмур бувара. Щухьурча, най дуна марцI дувара, кьатIув бунува марцI дуван бюхълай бакъахьурча, шаппай бучIайхтува. Бурчуйн дагьсса, микку лахъи лаглагисса кьяркьарал бурчу «ссихI ласлан» къабитлатиссар, чIумущал бурчугу ччяни зия хьунтIиссар. Бурчул усру щинай марцI дурнугу къахъинссар. Бюхъавай кьаркьсса аццух марцI дувара, чара бакъашиву духьурча – ацци дахьра хъатан дурну.

Халкьунналми маслихIатру

* * *

ДюрчIуми (бурчул ягу ванил кIанаймунил) уссавун щин къадуххан, вайннуйх дуккира къазрал аьгъушиву.

* * *
Кремран ягу хъандалун кIанай уссайх дуккан бучIиссар касторданул аьгъушиву ягу вазелин.
БучIиссар касторданущал шарда дусса ччимур гъаттарал ягу лелуххул аьгъушиву цара-ца лагрулий хIала дурну дуккангу.

* * *
Усру батарейкалий ягу батарейкалучIа кьакьан дуллан къабучIиссар, бурчу, хъяхъа куну, ччяни зия шайссар. Атил хьусса уссавун кказит бавкьуну, аьркинну бухьурча, чIун-чIумуй бахханагу буллай, цайнура цирда кьакьан дитира.

* * *
Бурчул усру, бюхъавай, гьарца кьини гайра-гай малахларди, бурчущагу «бигьалаган», «ссихI бюкьан» бюхъаншиврул.

Усру машан ласласийни хIисавравун ласун аьркинмур

Ссуттил усру машан ласласийни, хьхьичIххуттай вайннул ххуйшиву, къищущиву дикIан къааьркинссарча, хъатрулиясса ва дякъиясса мюхчаншиву, занан бигьашиву дикIан аьркинссар. Ххуйшиву ва мода гьава гъилиний дуллан диртун хъинссар. Ссуттилсса ва кIинттулсса усру бикIайкунсса (натуральнайсса) бурчулсса ларсун хъинссар. Бурчул уссал гъилишивугу дугьайссар, хъатругу духхан къаритайссар, ччаннугу, «бугъ къабуллай», «ссихI ласлан» битайссар. Бурчул уссаха къуллугъ буллангу бигьассар цайминнуханияр.

* * *
Замшалул ва нубукрал усру бюхъавай гьава кьавкьни ларххун хъинссар. Хъатрулул ва щинал вайннул диц-куц зия дувайссар.

* * *
Уссал чIаннал лахъшиву дикIан аьркинссар 1-2 см. сантиметралуяр кIюла дакъасса, гъарал щин къадилланшиврул. ЧIан цурдагу дикIан аьркинссар цIакьсса ва бигьану лахIлахIисса. Никъа бусса ус ласлай бухьурча, ласира никъа уттамур, никъурал лахъшивугу 4 см. ххишала дакъасса.

* * *
Ххирасса, ххуйсса уссалгума бюхъайссар щин итадакьлан, агарда миннуха къуллугъ къабулларчан. Усру хъунмасса хIаллай дияншиврул ва диц-куц зия къахьуншиврул, карчI къадурну, гьарца кьини къуллугъ буллан аьркинссар миннуха.