Вай гьантрай, щалва билаятрай кунна, Дагъусттаннайгу Аьрасатнал халкьуннал Цашиврул кьинилун хас дурсса шадлугъру дур. Ва кьини бигьалагай кьинир цурдагу, амма цаппараннан бюхъайссар ци байран кьинирив къакIулну бикIангу.
Ноябрь зурул мукьилчинмур кьини кIицI лагайсса ва байран цIусса, жагьилсса байранни. Ванил тарихмур ччясса заманная нанисса бур. 1612-ку шинал Москав Польшанаща тархъан був­сса чIумуцIун бавхIусса бур ванил таварих. Гьамин, ва кьини (хьхьичIвамур календарьданий хIисав буварча, октябрьданул 22-нний) Нижегородуллал староста Кузьма Мининнул ва князь Дмитрий Пожарскийл каялувшиврийну гьужумрай лавсун бур Китайгород. Оьруснал аьрщив чапхунчитураща мурахас даву, польшанал аьрал лихъан баву таний Аьрасатнал хIукумат цIакь шаврил ххуллий­сса, агьамсса ххувшавуну хьуссар. 1613-ку шинал паччахI Михаил Федоровичлул цIакь дурссар Москав тархъан бувсса кьинину. 1649-ку шинал паччахI Алексей Михайловичлул ноябрьданул мукьилчинмур кьини Къазаннал Заннал Ниттил иконалул кьини душиврул хIукмулий къулбас дурссар, ва диндалул ва паччахIлугърал байраннугу ккаккан дурну. ИконалуцIунсса дахIавугу дур укунсса: Къазанная гьан бувсса ва иконалущалли Дмитрий Пожарскийл аьрал-ополчентал Москавлив бувхсса. Ва байран Аьрасатнаву кIицI лаглай бивкIссар 1917-ку шиналнин. 2005-ку шинал тIурча, Аьрасатнал Президент Владимир Путиннул ноябрьданул мукьилчинмур кьини Аьрасатнал халкьуннал Цашиврул кьини хIисаврайсса байранну цIунилгу цIакь дурссар.
Москавливсса ЯтIул майданнив 1818-ку шинал император Цалчинма Алексейл биялалийн бувну дацIан дурну диркIссар «Гражданин Мининнун ва князь Пожарскийнсса» гьайкал. Ванил скульпторгу Иван Мартос ур, гьайкалгу Аьрасатнал тарихраву, къапаччахIнансса, къаполководецнанссача, халкьуннал вирттаврансса цалчинсса гьайкалну хьуну дур.