ДР-лул культуралул министр Зарема Буттаева бивунни СССР-нул халкьуннал артист, композитор, дирижер Мурад КъажлаевлучIан шаппай.
Хьунабакьаврий Мурад Къажлаевлул бувсуна министрнахь ялун нанисса чIумул ччясса мутталий цанна дуван дакIнийсса давурттая, цалва кулпатрал, Валидал, аьпалун куну, октябрьданул 28-нний хьунтIисса «Вернисаж» премьералия. Ванивух гьурттуну бур Дагъусттаннал опералул ва балетрал театрданул труппагу, мукунма композиторнал арснал душ Валида Къажлаевагу, сценограф ва костюмирттал художник хIисаврай.
Ва бакъассагу, композиторнал оьрмулул ва творчествалул ххуллун хасъсса зал хIадур буллай буссар А. Тахо-Годил цIанийсса Национал музейраву. Шивусса экспонатирттавух буссар чIаванийва ниттил ванан пишкаш бувсса рояль, «Горянка» партитуралул оригинал, нитти-буттал суратру ва чIярусса цаймигу бусравсса затру. Зал тIитIинтIиссар ноябрьданий.
Министрнал ва композиторнал дянив мукунма ихтилат хьунни халкьуннал шаэр Расул ХIамзатовлул юбилейрайн багьайссагу. Юбилей кIицI лагантIисса 2023-ку шинал Дагъусттаннал опералул ва балетрал театрданул ккаккан дувантIиссар музыкалул ва драмалул «На вил пикрирдай ура» тIисса цIанилусса концерт.
