Аьрасатнал Президент Владимир Путиннул баян бувсса мобилизация, щалагу республикалий кунна, нирхиравун руртун дачин дурну дур ЦIуссалакрал райондалийгу.

ЦIуссалакрал райондалия, повесткартту дуркIми бакъассагу, цикссагу жагьилтал лавгунни хушрай аьралий операциялул иширттавух гьуртту хьун. Мукунминнавух ур Айгунов Кьурбангу. Военкоматрая ва шамийла махъунай зана ивтун ур, шанма мюрщисса оьрчI бушиврийн бувну.
Увну ур Кьурбан ЦIуссалакрал райондалийсса ЦIуссалакрал шяраву. Школа къуртал бувну махъ, дуклан увххун ур Дагъус­ттаннал паччахIлугърал медициналул институтравун. Хьхьич­Iунсса хIасиллай инсантал хъин бай факультетгу къуртал бувну, зий ивкIун ур буттал шяраву хIакинну. Цаппара шиннардий зийгу ивкIун, кулпатращал маслихIат ккавккун бур Тюменнал областьрайн изансса. Тиккугу Кьурбаннул ккаккан бувну бур цува пиша ххуйну кIулсса, итххявхсса хIакин ушиву.
Кьурбан аьралий иширттавух гьуртту хьун ччай ушиву бусан военкоматрайн лавгсса кIул хьувкун, нину, ссурвал, кулпат нигьабувсун, хъинну гьалак бувккун бивкIун бур. Аьсив бувксса гъанмигу паракьат бувну, цайми-цайми жула жагьилтурал кунма, цала бурж биттур бан махъаллил къавхьуну ур.
Военкоматрая ва тIайла ув­ккун ур Херсоннал областьрай­сса «Ахмат» тIисса госпиталь­данийн багьсса аьралитуран медициналул кумаг буллан. Медиктурал бригадалущал Кьурбаннул ххассал бувну бур, цIунцIияртту, щавурду хьуну, госпитальданийн багьсса цикссагу аьралитурал оьрмурду. Аьралитуран бакъассагу, госпитальданий Кьурбан хIаласса медиктурал бригадалул медициналул кумагру буллай бур укунмасса инсантурангу.
ЧIа учинну жувагу жула къучагъсса чувнан, цалла давугу ххаллилну бартдиргьуну, цIуллуну-цIакьну ичIунай зана шаву!